左丁山寫「無面授禍害深」引來幾位朋友回應。最受困擾嘅係地產P，佢送女兒入讀好難入嘅國際學校，以往非常高興，但自因肺炎停課以來，每個月為女兒交過萬元學費雜費，回報就係在家Zoom完又Zoom，就開始肉痛。另外一位貿易K，送子入屋苑著名幼稚園，每月使費近六七千，知道九月開始，全部用Zoom上堂之後，考慮將兒子退學，等明年再算，但又估唔到本港學校幾時恢復正常，退學是否明智決定呢？貿易K話佢有幾個同學都面臨同樣困擾。但另一方面，幼稚園校長亦煩到喊死，因為收到不少家長查詢退學事宜，退學之後是否可以復學呢（假設2021年一月冇晒疫情），假如學生出入旋轉門，不止影響幼稚園收入，還會影響教師情緒，精神緊張也。
幼稚園恐怕會有退學潮，有一位仁姐諗咗一條計，就係將兒子自國際幼稚園退學，每月慳番幾千蚊，然後去收學券嘅本地非牟利幼稚園報讀，有學券抵銷學費，跡近免費，Zoom咪Zoom囉，唔Zoom都冇乜損失。至於學習，呢位仁姐話：「我係WFH，公司有AB Team，咪自己買一啲補習功課習作教個仔做囉，教中英數幼稚園程度，我應付得嚟！」
真係想得幾周到，算無遺策咁款，香港人面對疫情，各有諗法，各師各法，一於醒目執生。冇法子啦，香港已進入「維民所止」年代，有權有勢者可以隨口噏，逆我者遭殃，香港人對當權者還有甚麼可以相信？信楊潤雄可以改善香港教育乎？搵一位做慣地產房屋嘅AO去教育局負責全港學校人事，幾有想像力呀，呢啲就係順我者昌嘞。
朋友C嘅千金得美國名校取錄，本來好高興，但知道全部上網授課之後，高興程度大打折扣，覺得交近60000美元學費好唔抵，問左丁山有乜意見。左丁山話交咁貴學費，有一半係在名校交朋結友嘅代價，如果冇校園生活，識唔到人，俾三萬美元學費就差不多！但名校邊度肯減學費吖，於是去與不去美國讀書，又成為朋友C與女兒嘅難題，權宜之計，係去比較便宜嘅州立大學讀本科，以佢女兒入得名校嘅本事，在州立大學取得magna cum laude畢業並非不可能，畢業後希望疫情已過，咪憑頂高嘅GPA申請入番名校讀碩士博士囉。