剛帶領利物浦贏得30年來首個英格蘭頂級聯賽冠軍嘅高普，力壓車路士嘅林柏特、李斯特城嘅羅渣士同埋錫菲聯主帥韋達，獲英超賽會選為19/20球季最佳領隊。利物浦上季以38戰得99分封王，拋離亞軍曼城18分之多，其間紅軍更創下多項紀錄。就算未能以不敗之身完成球季，但紅軍喺二月底輸畀屈福特之前，已造出跨季44場聯賽、長達442日嘅不敗走勢，喺英超歷史上僅次於阿仙奴喺03/04球季封王時創下嘅連續49場不敗紀錄。此外，自從上年10月作客賽和曼聯1:1後，利物浦一口氣連贏咗18場聯賽，追平由曼城保持嘅英超連勝紀錄，呢段強勁走勢亦令紅軍一度喺榜首拋離次席嘅球隊25分，成為英超史上最大領先優勢。現年53歲嘅高普喺2015年接掌利物浦，紅軍喺18/19球季以1分之微不敵曼城，但仍以97分創下英超亞軍得分紀錄，佢哋喺19/20球季終於再進一步，贏得球會史上首個英超冠軍。
另外，受英國政府修訂防疫入境政策影響，利物浦已取消去法國埃維昂進行季前集訓嘅計劃，將會改到奧地利練兵。武漢肺炎疫情仍然嚴重，英國政府上周四公佈，所有由法國進入英國嘅人士都要接受14日隔離，為免影響備戰工作，紅軍只好放棄到法國集訓。消息指，利物浦大軍將會出發到奧地利嘅薩爾費爾登，進行為期10日嘅集訓，預料佢哋將有機會同當地班霸薩爾斯堡進行熱身賽。完成奧地利嘅集訓後，利物浦就會返英國，準備喺8月29日上演嘅社區盾對阿仙奴。新一季英超聯賽將喺9月12日揭幕。