38歲的莊端兒上月突然改名莊韻澄，除了希望「疫」境重生，最重要是斬爛桃花，她自嘲「壞人磁石」，在愛情路上經歷跌跌碰碰才領悟感情真諦，痛過才懂得愛自己。談到圈外的前夫及舊愛張致恒，她無怨無悔，更感謝對方令自己成長。訪問中，莊韻澄表示近日跟母親拜觀音，看佛經有所得着。
撰文：祖李
攝影：周樂恒
莊韻澄早前為玄學節目做主持，機緣巧合下由師傅指點，改名轉運，她說︰「之前同北斗魁師傅主持玄學節目《天機改命》，佢提醒我端兒個名唔好，識親啲男人都會花心同脾氣唔好，加上個名帶把刀，對健康唔好，就算行運，個運有幾強把刀就有幾利劈返自己，所以決定改命轉運。」
與張致恒在2013年尾交往，最後因為難忍男方多次偷食，2016年宣佈分手結束3年情，單身幾年的莊韻澄，曾因為分手打擊對愛情缺乏信心，加上每次感情都有第三者介入，自己又行性感路線，擇偶時障礙多多︰「我都好驚啲男人過嚟係為咗我身材，亦唔想畀人感覺我係隨便、好玩，好多時會自行落閘，小心啲。姻緣一直唔強求，隨緣啦！不過師傅都點醒我，話唔通你成世得一個人咩！加上佢話改咗名會撞到正桃花，令我安全感大咗，以前會係好好條件至會出去應約試吓，𠵱家會放寬啲。」
莊韻澄說以前為了討好男友，甚至連信仰都可以跟隨︰「有件事要澄清係其實我冇洗禮，唔係信徒，之前係跟前度返教會，嗰一刻決志咗，但當時未清晰自己嘅信仰，當時我冇主見，以為同佢一齊追尋，但最終都冇選擇到，可能因為分咗手，亦因為當中有啲真理我解唔通，不過近期跟媽咪拜觀音，睇佛經我反而開竅。」對於癡心錯付，她笑指當自己買教訓︰「男友都係自己揀，行唔到落去係兩個人嘅事，唔需要互數，以前唔明，咪成日都做咗壞人磁石，但有一個令你痛啲就知道有乜嘢問題，入咗娛樂圈識到佢，仲要搞到咁大，嗰陣咁多人討論，自己至如夢初醒，原來嚴重性咁大，發現原來男人係唔可以放第一。」
母親做地產投資有道，二十多歲就開始學炒樓，後來亦因為炒樓，搞到結婚，莊韻澄說︰「嗰陣因為炒樓，其中一層寫咗佢（前夫）個名，我自己已經太多樓，但分手嗰陣面對政府辣招，如果當時層樓要轉名我要畀多二百萬，而佢又願意簽字結婚，然後轉返層樓畀我，所以就辦咗手續，好彩佢唔貪心，其實諗返我都覺得自己好大膽。」不過她說做業主並非一件過癮的事，自己亦曾試過差點炒燶樓︰「我好慶幸生於80年代，有個識投資屋企，教我點喺樓巿搵到第一桶金，但董伯伯上場後完全冇空間，你咪以為有物業係一件好舒服嘅事，當你面對海嘯call loan，你真係會喊，我真係試過幾間銀行一齊打嚟，每層樓跌6、70萬，甚至過百萬，死嘞！一時間我點攞幾百萬出嚟。所以早幾年我見到李嘉誠撤資，我都跟住佢沽晒，但沽完遇着疫情，都會坐食山崩，最後都係要靠自己努力搵錢。」