【本報訊】周一警方大舉闖入《蘋果日報》大樓，曾篩選傳媒採訪，稱「唔會阻礙警方工作」才准採訪，被阻傳媒包括香港電台，引起社會譁然。事隔四日，警方回覆記協查詢，辯稱「當日只是出現溝通和聯絡延誤，最終港台記者亦順利進入封鎖區內採訪」。
記協主席楊健興指斥警方轉移視線，「完全錯晒方向」，批評警方未有認清問題關鍵，並非某間媒體無法採訪，而是警方不應出現以媒體規模大小、報道是否持平、過往是否合作等主觀判斷，篩選某些「可信傳媒」採訪，「我哋理解，政府公開講對傳媒、媒體採訪都係講公平公正，基本上如果有佢認可證件嘅，包括傳媒機構、記協、攝協，有啲場合係嗰啲先入到去嘅，再冇區分合唔合作，或者持唔持平，如果再咁落去，係無咗個制度，唔係講法治」。
警方當日表示會揀選規模較大的傳媒，楊健興質疑：「十個人嘅機構，你唔可以話佢唔係新聞機構，係咪一定要一千人傳媒機構先至係高水平啲？完全唔係咁，反映佢哋對傳媒諗法有問題。」警方重申當日安排是試行；楊健興指業界已幾乎一面倒反對，要求停止篩選。