近日最振奮人心的新聞，肯定是紐約一間會計師事務所公佈的移民調查結果，單單今年頭六個月，竟有接近六千人放棄美籍，比起去年全年二千幾宗個案，足足增長了一點八倍！嘩，許多海外人士虎視眈眈的那張綠卡，原來已經大幅度貶值，甚至淪為負資產，中國人向來春江水暖鴨先知，凡事最怕執輸，不會不爭先恐後加入脫美大軍，可想燒花旗護照的縱火者，少不了大陸的皇親國戚，和香港高官的配偶子女── 一定係，除非唔係。 這才是大粉紅小粉紅正確而漂亮的做法呀，與其皇皇不可終日坐等美帝制裁，不如由誠實的身體搶閘炒特朗普魷魚，先下手為強，扭轉主動和被動的位置，任人魚肉的小受變成威武的小攻，在世俗成見中，搞基都搞得特別驕傲。以後不識趣的記者問起貴公子貴千金是哪國公民，可以毋庸再閃閃縮縮，挺起胸膛大大聲答「中國」，你話幾吐氣揚眉。
充滿婦人之仁的我，很好奇這批有美人唔做做逃兵的勇士，離開遍地黃金的阿美利堅後究竟何去何從 ── 既然抗美，不會統統順勢援朝，成群結隊跑了去北韓買豪宅吧？該地應該有大量具韓星潛質的鮮肉等待糖爹哋發掘，他們自幼接受極權教育，必定聽教聽話，絕對不會駁嘴駁舌扭手扭腳，真係幾諗得過。而且申請脫美，手續費折合港幣不過一萬八千元，元祖購物導師狄女士話齋，「唔貴唔貴，一啲都唔貴」。吓，你認為收這個價錢不合理？呢點我費事拗，你不妨北上做個實驗，公告以同樣銀碼可代辦脫中手續，睇下有乜反應吖嗱？話唔埋，只需五分鐘就賺到第一桶金！