疫情下藝人個個難捱，莊韻澄說為生存要放下藝人身份包袱，她積極發展網上直播平台，除了銷售，更幫商家做埋製作及市場推廣︰「以前好多人會畀幾萬蚊一個藝人出個post，但𠵱家唔係咁易，我哋都要放低藝人身份，度橋、剪片都要做埋。」
以往長駐澳洲的父母，去年返港本來打算留幾個月就走，但疫情爆發就一直留港照顧女兒，莊韻澄說父母供書教學，難免對她有期望︰「我會努力搵多啲錢，感覺自己冇咁廢，但社會環境佢哋睇到，大家都艱難。父母覺得我入娛樂圈好任性，因為呢個圈唔係表面咁風光，佢哋會覺得你點解唔腳踏實地打份工，要拋頭露面又要貼錢。媽咪惡啲會鬧，佢嬲我、哦我反而好過啲，爸爸就只係失望語氣，但令我仲難受，唉！好似好不孝，𠵱家會盡量陪兩老，呢個亦係我唯一盡孝嘅方式。」