自從美國政府出手制裁香港，仲整份Sanction Eleven制裁中港官員名單，中央梗係全力反擊，制裁美國人！但呢份名單最多去到制裁參眾議員，似乎未夠重手！慈雲山有間跌打醫館，就係門外掛上「制裁美國特朗普蓬佩奧禁止到本醫館診症」中文橫額，一係唔制裁，要制裁梗制裁最大嗰幾個！
其實呢間醫館2019年因美國加中國關稅，已經掛過一條要加收美國人25%「關稅」橫額，當時八方訪問過醫師香國成，佢話係中國人應有嘅表態！今次佢直情「制裁」美國總統同國務卿！香醫師同傳媒講，佢係唔妥美國霸道，但都知掛橫額作用唔大，特朗普同蓬佩奧一定唔會去佢醫館，但要表達不滿咁話！查實今次張橫額又係一隻英文字都冇，特朗普同蓬佩奧又點知被「制裁」呢？