周庭日前被指涉違國安法拘捕，結果震動成個日本，由政界、藝人、歌手、以至文化甚至動漫界均發Twitter聲援，仲齊聲鬧中共及港府，以一個外國女仔，可以得到日本社會咁廣泛支持，周庭係絕無僅有，一班藍絲自不然出動，抹黑有外國勢力「訓練、支持」周庭，繼之前黃之鋒有CIA、神盾局支持後，今次周庭仲勁，一班藍絲「揭發」佢原來係幪面超人！
噚日有藍絲群組瘋傳「周庭」一張接受軍事訓練嘅相！其實張相係最新《幪面超人Zero-One》入面嘅女性幪面超人，角色個名叫「刃唯阿」，由女演員井桁弘恵扮演，呢個角色好受歡迎，而演員井桁弘恵係寫真女星出身，個樣有少少似周庭，但明眼人一睇就知唔係同一人！但竟然有藍絲信以為真。井桁弘恵同周庭相似嘅地方，係兩個都23歲。有網民睇到笑到收唔到聲，恥笑藍絲腦殘之餘，仲問國安警察喺周庭屋企搵唔搵到佢條變身腰帶呢？
李八方