被美國制裁的PK鄧接受01訪問，訪問出街時間夾到正，正好挑機蘋果日報，對#FreeJimmy與Agnes的人嗤之以鼻。PK訪問中自稱得悉被制裁後，心情舒暢。香港人七成抑鬱，得佢一支公心情舒暢，老天都會妒忌。太老定舒暢，招惹北大人猜疑，條友係咪美帝「鬼」？風水高人篤過灰，某某其實明藍實黃，這個某某，阿爺合法懷疑係佢喎。咁就闔家富貴！抓咗蘋果，累死老婆！是以，PK心情咪高度舒暢住，打定底先：
一，家有急事，幫全家三代改名換姓，避過制裁。有仔生嘅話，改名做鄧小平。
二，必須自我審查，食生果的話只吔蕉，每日一條蕉，孱仔都能嫖。腎虛驚肚屙的話，叫工會送佢菠蘿。
三，與京官一同上榜，光榮到震，明星飯聚甩罩唱K打牌時，順手拎走麻將牌就手尾長。拷問吓你個偷麻將牌警長下屬，係咪想碰三萬，thx？
四，銀行落閘，注定要搬錢返屋企收埋。僭建地牢，鄭司長與老公是「專家」，學吓嘢。
五，澄清將蘋果日報丟去回收箱那個四眼佬唔係自己的孿生細佬後，下令兄弟買晒全市嘅香檳。天眼恢恢，有朝一日真PK時，冇人開到香檳慶祝！