涉嫌行使假護照同捲入一宗洗黑錢案嘅巴西退役球星朗拿甸奴，𠵱家仲俾巴拉圭當局軟禁喺首都亞松森一間豪華酒店，最近有報道話佢今個月24號就可以重獲自由，唔知係咪消息嚟得太意外、太開心，當地傳媒話「細哨」早幾日涉嫌違反軟禁守則，搵咗一大班女模返酒店房開P喎。參加者除咗收到禮物之外，現場亦有美酒美食供應，消息人士仲話：「從外表睇嚟，我相信全部都係模特兒，出名嘅都係經停車場出入，唔出名個啲先喺酒店正門出入，再由汽車接走。」唔知今次細哨涉嫌違反軟禁守則，會唔會影響佢放監嘅日子，事關同細哨一齊被拉嘅哥哥羅拔圖，已經同控方達成認罪協議，主審法官禮拜一仲宣佈會喺本月24號續審，所以細哨兩兄弟最快可以喺當日獲釋。報道仲話，細哨將會被罰90,000美元（約70萬港元），但獲得「優惠」唔會留有案底，佢返回巴西之後仲可以隨時出國，但事前要先知會巴拉圭當局，而每隔三個月仲要向巴西聯邦法官報到呢！