效力過拜仁慕尼黑同曼聯嘅前英格蘭國腳夏格維斯，認為多蒙特話查頓辛祖已秘密續約至2023年，只係賣球員前嘅慣常伎倆，深信呢位英格蘭翼鋒會喺短時間內「入魔」。多蒙特總監索克話同紅魔交易嘅限期已過，代表辛祖今夏唔會離隊，仲話呢位翼鋒承諾會續約至2023年。不過夏格維斯喺BT電視台節目受訪時就話：「擺明虛張聲勢，我認為佢（查頓辛祖）會喺短時間內成為曼聯球員，多蒙特係想要多啲錢啫。好明顯佢哋知道曼聯好想要辛祖，只要曼聯出到多蒙特心入面個價，就會買得成。」多蒙特中堅曉姆斯就相信球隊已留住辛祖：「佢係個可以帶嚟不同嘅球員，我好開心佢決定留低。」