周二上演餘下2場歐霸8強賽事，今季嘅四強分子已經全數誕生。其中以1:0踢走狼隊嘅西維爾，就成功第6次打入歐霸盃4強，將會硬撼今屆奪冠大熱曼聯，爭奪決賽席位；至於另一場以4:1大勝巴素利嘅薩克達，就要惡鬥意甲球隊國際米蘭。四強止步嘅狼隊，終於結束咗長達13個月嘅球季，領隊紐奴就話喺雙線作戰嘅情況下，攞到咁嘅成績都已經收貨，雖然下季冇歐洲賽踢，但都唔使太灰心。
狼隊今仗都唔係完全冇機會，開賽初段攻勢都明顯較多。到13分鐘，艾達馬查奧爾展示驚人爆炸力單騎殺入禁區博到12碼，可惜射手魯爾占美尼斯操刀射得太正俾對方門將撲出，今次亦都係占美尼斯加盟狼隊之後，第一次射失12碼。到88分鐘西維爾終打破僵局，奧甘波斯喺禁區頭槌頂入，最後就憑呢個入波1:0淘汰狼隊，第6次闖入歐霸盃4強，當中近5次最後都順利封王，不過今次就先要過被視為奪標大熱嘅曼聯一關。
作為贏過歐霸盃最多次嘅球隊，其實西維爾喺球季重開之後，就一直未輸過，連埋停擺之前已經連續19場不敗，仲要連續五場冇失過波。西維爾上一次對曼聯係17/18球季嘅歐聯16強，當時西維爾仲成功淘汰曼聯晉級。教練盧比迪古就話雖然紅魔係豪門，但相信入決賽嘅會係西維爾。
輸波出局嘅狼隊，呢支近年英超奇兵喺上年7月25日就展開球季，由歐霸外次圈賽事開始，持續咗近13個月終於完成球季。狼隊喺歐霸出局，加上上季英超排第七位，最終都無緣喺來季再參加歐戰。領隊紐奴賽後就覺得入唔到四強好失望，不過都強調對球隊今季嘅表現感到自豪：「我哋本來想繼續晉級，我哋已經好接近。每個人都好失望，但係我哋唔可以忽視班球員嘅努力。今季我哋征戰歐霸同英超，過去呢一年幾球隊一直都好努力，我哋已經攞到一個唔錯嘅成績。」
雖然西維爾鬥曼聯嘅戲碼比較吸引，不過另一場嘅八強賽事，上季烏超冠軍薩克達都輕鬆以4:1大勝巴素利，四強會對意甲勁旅國際米蘭，以呢四隊目前嘅狀態嚟睇，真係好難講決賽席位會花落誰家。
