講起全國政協副主席兼前特首梁振英689嘅細女梁齊昕，大家即時諗起嘅，應該係佢三年幾前公開怒摑「龍蝦」、即係佢母親嘅一幕。自從689連任特首夢碎後，甚少再公開露面嘅齊昕，今年5月起突然再次活躍於網上世界，不時喺ig分享自己行街買衫食嘢相片，噚日更上載多幅蛋糕相，原來係要幫689慶祝66歲生日。
齊昕噚日上載嘅相片中唔見龍蝦，只見689彎低身望住堆生日蛋糕。而其中一個蛋糕，竟然有三隻昆蟲（疑似係蜜蜂公仔）喺蛋糕上面，唔通齊昕覺得向來品味獨特嘅689鍾意食蟲？
網民祝見證民主來臨
齊昕做孝順女出帖文為爸爸賀壽，真係值得一讚，亦引來不少網民前來留言「賀」689，當中有人響ig留言：「支持蘋果日報」、「得提子咋？蘋果呢？佢最喜歡㗎，日日買」、「送689份蘋果畀daddy賀賀佢」等。
不過在ig嘅留言算溫和，喺佢嘅fb留言就較為有火藥味，唔少網民多謝齊昕出po，讓網民賀壽，更讚佢係「#手足嚟」，有人留言：「插三支蠟燭慶祝」、「擺到似貢品咁」、「3個蛋糕打橫擺，唔吉利呀，拜神咩？！」、「祝長命百歲，見證香港有民主的一日」、「兩個六、返大陸」等。