陳柏宇和老婆符曉薇（Leanne）結婚3年，育有快滿兩歲的可愛女兒陳羿辰（Abigail）。Leanne日前上載影片，自爆在5月懷孕一個多月時，一直腹痛及出血，看醫生後證實為宮外孕，更導致輸卵管爆裂，要接受緊急手術，切除左邊輸卵管保命。陳柏宇昨日重提當時情況：「佢喊，我唔識安慰佢。」
現年37歲的陳柏宇和34歲的符曉薇在2017年結婚，前年誕下囡囡陳羿辰，陳柏宇錫女錫到燶，不時把女兒的相片放上網，被封為「晒B狂魔」。日前Leanne在網上拍片自爆，原來今年6月初不幸小產。Leanne指一直想為Abigail添個弟弟或妹妹，5月時發現懷有第二胎，怎知其後狂出血及腹部疼痛，看醫生後證實為宮外孕，因BB着床在左邊輸卵管，導致輸卵管爆裂，6月時更要接受緊急手術切除左邊輸卵管。Leanne坦言當時很傷心，曾一度幻想胎兒仍在，她並留言：「只係希望幫到有需要嘅人。」
陳柏宇昨日接受《蘋果》電話訪問，他指當時太太懷孕5、6個星期：「佢痛，去醫生度檢查，發現宮外孕要做手術，救唔到，只能排走，感覺好大打擊，因為最終要切咗一邊輸卵管，喺冇得選擇情況下，好似冇得太唔開心，明白要發生就發生，本身有囡囡幫到好多手，如果冇，要切輸卵管就唔開心。」問到怎樣安慰老婆？他說：「佢有喊，有分享自己心情，我同佢溝通件事，我唔識安慰佢，唔應該嬉皮笑面呃呃𠱁𠱁，應該成熟處理。」
Leanne接受電話訪問時表示情況已經好轉：「我好返好多，但因為疫情唔敢去覆診，身體冇乜嘢。」她指大約5月發覺懷孕個幾月：「一直痛同出血，去睇婦科，開咗安胎藥，日日都有食，大部份時間卧床，臨覆診嗰日突然好痛，好似盲腸炎落唔到床，去到診所醫生一照入面出晒血，爆咗輸卵管，九成係宮外孕，緊急做手術。」
回想當時心情，Leanne說：「不停問醫生，BB會唔會仲喺度？唔想接受現實，做完手術後，成日諗BB仲喺度，有同老公傾，佢話我咁諗唔健康，自己好失望，怪責自己，但其實件事自己控制唔到。初頭做完手術好虛，媽咪幫手煲湯畀我飲，陳生幫手做家務，放假又陪我哋出街，同埋有朋友試過兩次宮外孕流產，最後生咗BB，朋友好堅強，自己覺得唔應該困死，但6月1日做手術，6月尾狗走咗，好傷心。」問到有冇信心再懷孕？她說：「驚呀，因為再有宮外孕機率高，但遲啲會再嘗試吓。」
Leanne昨午再於Ig留言解答網友問題：「有網友問點解咁遲先知宮外孕，早啲去產檢就可以避免爆輸卵管，因為疫情底下，所以避免成日去睇醫生，所以遲咗去睇，先搞到咁。」Leanne又大爆陳柏宇搞笑𠱁她：「護士幫我吊鹽水，陳生揸住杯水過嚟同我杯鹽水乾杯。」
陳柏宇老婆符曉薇宮外孕流產，切除輸卵管，幸已經康復無恙。至於日後影響，婦產科專科醫生靳嘉仁昨日接受《蘋果》電話訪問表示：「最緊要睇吓另一條輸卵管有冇病，如果完全正常，媽媽再懷孕嘅機會分別唔大，如果另一條輸卵管都受到破壞，例如有盆腔感染、內膜異位症等，媽媽嘅受孕機會就會大減，而且再有宮外孕機會都會高咗。」
靳嘉仁醫生補充：「媽媽再懷孕後，驗到有BB最好盡快睇醫生，盡快用超聲波肯定BB着床位置喺邊，如果好早期肯定係宮外孕，可以用藥物治療，減少用手術治療，同切除輸卵管嘅風險。」靳醫生指由於大部份宮外孕的形成原因未明，故沒有任何方法預防。