810大濫捕，將明日新疆的明日，拉近到當下。我習慣非繁忙時間搭巴士順道收藍絲風，大濫捕翌日底褲口罩巴士阿叔大剌剌在關愛座發表偉論，彩蛋在，大叔竟然鬧二百差佬拉人兼欽點傳媒「俾着數」，時機錯L晒。「講咗国安法冇追溯期，反口唔認賬，信用跌到零。叫我哋這批老嘢，點敢去撩喉嚨呀，話唔埋，真係抽埋你DNA，再用健康碼限制活動範圍，以後佢話行左就左，冇人唔敢行右㗎啦。」
大叔個樣幾柯P，柯P已經唔敢講兩岸一家親，反而預測香港走得嘅人和錢都唔會留。美國左派大師Noam Chomsky形容特朗普與中共打架，如兩頭大象開片，香港淪為腳下那塊爛泥草。大象論一直用來比喻中美台三角關係，當蔡英文迎接美國衞生要員專機訪台，香港無奈頂上爛地的空缺。由百年漁港到今天的一笪爛泥，當習總與侵侵回歸塵土的N年後，唯獨獅子山依舊丕變。畫家怎樣描繪「從前，有個香港」（2019-2047）好呢？堆填區竟然有蘋果，逼爆監獄的是風雲。我想到「大象席地而坐」電影中的一片死灰，年輕人決定起行去找席地的大象，會看到嗎？別去錯非洲波札那，當地已有四百多頭大象離奇猝死。