壹傳媒（282）暴升後一呼百應，所有媒體相關的股份，黃大升藍小升，場面非常墟冚，亦都帶動了股仔炒作，咁啱科技龍頭股急回吐，科技指數連跌四日，相映成趣。舊經濟股昨天的表現亦跑贏大市，航空股、本地銀行及地產股都逆市上升，究竟普京的疫苗會否令新舊經濟股強弱互換，要睇多幾日，但弱股過殘，只要有些少催化劑，隨時挾一轉勁嘅。
近日刨通告時睇到，同得仕（518）發了通函，原來4月宣佈賣深圳物業，拖拖拉拉搞咗4個月，現在進入最後直路，將於8月26日舉行股東特別大會表決議案。此通函含金量極高，賣物業將錄得2.9億元的特殊收益，如交易獲通過，將用1億元作派發特別股息，1,700萬還債，6,500萬用作在越南廠房搞太陽能發電或採購口罩原料作生產，餘下億幾就撥作營運資金。
股仔賣物業錄大額盈利，過去幾年時而有之，但唔係每一間公司，肯在通函中寫明，會派發特別息，同得仕仲講明派幾多，夠晒透明度。同得仕作為老牌工業股，近年交唔到業績亦無炒作因素，致股價長期偏低，現時公司市值只有2.6億，按通函披露，交易完成後，公司淨資產將升至5.5億，即現價有逾5成折讓，而特別息金額，即每股約0.22元，等同現時公司市值的37%。
戰友可能會話，咁超值的股，有刁都唔識升，是否賊股來的？溫馨提示返，現時David Webb持有6.2%股權，而早前青冰推介過，昨天曾創新高的國際家居零售（1373），仲有壹傳媒，全部David Webb都有揸，全屬正氣股，要學壹仔喪炒，同得仕應該冇可能喇，但在投票日前破返4月頂位0.71元，應是大概率的事。
青冰