警方用《國安法》之名拘捕多名壹傳媒高層，仲大舉搜查蘋果日報大樓近九個鐘，員工除咗返工要被登記身份證同個人資料，唔少人工作枱被搜，連去廁所都被警員跟住，折騰足大半日。事件發生後，來自四方八面嘅市民同讀者，用唔同方式支持《蘋果》同記者，仲全力爆買《蘋果日報》，八方喺度感激各方對《蘋果》支持，《蘋果》上下一定會堅守崗位撐到底！
劉慧卿贈花籃打氣
《蘋果》管理層為咗慰勞同事，噚日就喺大樓二樓中庭位置搞咗個「tea set加油站」，為同事打氣，實行食住撐！對抗極權，真係要食飽先夠氣力㗎！公司仲喺中庭整咗個大型banner，寫住「辛苦晒！各位同事！」又專登印咗打氣小貼紙免費派畀同事。八方睇到同事報料嘅相，下午茶有雞翼、薯條等多款小食同飲品。
諗起被扣查嘅公司管理層，能夠自由安心食個下午茶已經唔容易。 曾經做過記者嘅卿姐劉慧卿噚日亦特登送來花籃，寫上「遇強愈強。感謝各位為自由、法治、人身安全和民主的努力！祝各位安全、健康！」