曾經看過一個調查，現時小朋友的夢想，多是成為KOL、YouTuber呃like賺view輕輕鬆鬆百萬年薪。但這位成長於七、八十年代的中佬，兒時夢想簡單得多。在那個年代，日本特撮片興盛，看《幪面超人》會幻想自己長大後可以變身，鹹超又好，幪超都好，都係英雄。他沒有超能力，卻勇敢做自己，在亂世中駕着黃色戰車為大家帶來一點歡樂，也算是……至少是堅守了自己夢想的英雄。
「面對當年情~真心說句，祈求完全原諒我當初的不對~在你離開的一刻說出~~~情深的一句~~~」化名「姚走音」的「走音超人」，現職貨車司機，他沒有誇張到要拯救地球的志業，但責任同樣重大：為現時笑唔出的香港人帶來一點歡樂。由起初瞞着家人偷偷出車，然後被人影相放上網取笑，到現在認識到一大班朋友，出車時停在路邊會有人邀請合照，在香港做超人，一點也不容易。
現在人人一機在手，輕輕鬆鬆影相拍片放上網分享，人人都是判官，你我他隨時都會被評頭品足甚至侮辱。姚走音說：「當初網上都有好多人笑我，有啲都幾侮辱性，看過後都是一笑置之，我並非做壞事，也沒有影響人。」相約網上群組成員出車，也有車友對他反感，「可能覺得我奇奇怪怪啦，不過之後同車友傾吓偈熟咗，知道我原來係一個五十二歲嘅大叔，cosplay出車只係一個兒時夢想，就開始對我冇乜嘢。有啲以前唔鍾意我嘅車友，而家都變咗朋友。」
訪問時雖然還未實施「口罩令」，但姚走音在戶外也沒有除下面罩，「就係想保持嗰份神秘感。」貫徹真正幪面超人的設定，「唔係怕人哋見到我真面目，有時同啲車友出車都會除頭罩。我唔認為係唔見得人嘅事，有啲人鍾意扮女人，有啲人鍾意扮男人，有啲人鍾意cosplay，我就鍾意扮幪面超人。」他努力堅持自己夢想，同時亦有自知之明，因為他自嘲為「走音超人」，「有時我會街頭唱歌，但又唔係唱得好好，有時會走音，所以就叫自己做『走音超人』。」
講夢想講得光明正大，但卻曾經瞞着家人，「他們覺得揸電單車危險。」但偏偏幪面超人都叫「拉打（rider）」，因為他們都駕駛電單車。「其實起初也講不上是否支持，因家人都不知我去考電單車牌。之後瞞着大家買了車，有時夜晚出車就當去踩單車。但瞞住家人始終都覺得內疚，也會影響出車的心情，所以最後決定向老婆自首，佢都嬲咗我一段時間，不過最後都原諒咗我，就一直玩到而家。」說到家人，難得仔仔沒有嫌棄老爸，一樣支持，「我九月先『甩P』，到時可以載埋佢。」
走音超人的座駕，是二〇〇八年的Honda Forza，鮮黃色拉花車身，車頭有幾隻角，為了安放特製改裝的頭盔，車尾特製頭盔架，「其他部份一買返嚟就係咁樣。我揸咗電單車未夠一年，玩咗cosplay兩年，未報名學車就睇中這部電單車。當時在網上睇到呢部車放售，一見就好鍾意，雖然未報名學車，但就買咗先。」他續說：「這部車最吸引我的是外形好前衞好先進，因為我要做幪面超人，所以我一定要找一部與別不同的電單車。」於是自己再搵材料在車頭加上裝飾，亦貼上「走音超人」標記。車頭上更有一隻眼睛的標誌，「其實我隊戰隊都仲有其他成員，不過並非所有人都有電單車牌，而且名都未改，只係設計咗個標誌。」
姚走音最愛的幪面超人是《幪面超人亞馬遜》，因為夠野性，但特撮片中亞馬遜駕駛的是越野電單車，而走音超人的是一部綿羊，「我係考棍波牌嘅，當時都有諗過越野電單車款，不過日常出車，綿羊始終舒服啲方便啲。」
頭盔亦有心思，除了有角有天線，還有一隻獅子。「個頭盔係真正電單車頭盔，之後自己加裝天線、裝飾。隻獅子係來自《絕對無敵》嘅『獅人鳳』玩具，覺得幾襯就整咗上去。」訪間當日還有另一位戰隊成員撐場，其頭盔上的一對角更加誇張，他表示之後都會報考電單車牌。至於一身貼身戰衣，其實有幾套不同款，「有啲係自己畫圖設計之後攞去訂做，有啲就係現成嘅再改裝。」
駕着戰車出巡，大小朋友看到姚走音都會笑笑口，大朋友覺得他奇怪而笑，小朋友就發自內心興奮地笑，停在路邊也有人找他影合照，「辛苦工作賺錢為乜？就係為咗開心。所以有時變身出車，有時出嚟唱歌，既可以接觸唔同嘅人，更可以為大家帶嚟歡樂，睇到佢哋開心，我都開心。」大熱天時，姚走音全副武裝上完飛鵝山拍照再遊走觀塘工業區，雖然這份熱誠未必人人欣賞，不過，超人性格就是樂天，有人笑就得，「笑我唔緊要，笑就得啦。」就算在這個時勢，就算大家戴着口罩，香港人也要笑到最後啊！
採訪：陳米高
攝影：蕭志南、潘志恆