【姐匙Talk】余旗棄事業箍富三代

雖然選美會近年已變質，已經無咗早年所講嘅美貌與智慧光環，又欠代表性，不過仍然有唔少師姐嘅「成功故事」，令到唔少港女仍然愛追呢個選美夢。好似千禧後選到名銜嘅「余旗」，攞到獎入行後際遇好好，好快就有唔少劇集演出機會，之後仲有機會拍電影，佢做藝員嗰陣已越住越豪，十年前已入住豪宅，真係財來自有方。

據知余旗嘅感情運比事業運更旺，同過歌手傳過緋聞，仲有同過富三代拍拖，拖拖拉拉咗五年，而佢更開到口想結婚，不過對方最後娶咗富家女。以為余旗失戀後會將野心擺返去演藝圈，點知佢棄花旦之位寧願離巢外闖。原來余旗由始至終都係醉心豪門夢，皇天不負有心人，真係俾佢識到另一個富三代，對方由於係名人之後，家族影響中、港、澳三地政商界，男友開投資公司外仲係內地政協，所以余旗好緊張呢段感情，識咗對方幾個月就話要去外國進修，為未來鋪路。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。