身兼全國政協常委嘅星島集團老闆何柱國成日有唔少出位嘅評論，特別對特首林鄭月娥，佢曾經喺旗下報章登廣告批評777，話777令社會撕裂，對佢好有意見，又話777係「鴕鳥」，雖然777盛傳因夠忠心，所以得國家主席習近平支持，仲傳佢想連任，何柱國前晚去電台節目被問到點睇777連任，一樣唔畀面，話天都有眼嘅，777想連任特首？「或者一隻眼開一隻眼閉都未定」。
「要畀多啲問題佢思考」
何柱國前晚去陶傑主持嘅商台節目《光明頂》做特別嘉賓，問到777連任消息時，何柱國稱777話中央支持自己，又越嚟越愛國，所以出面傳佢連任，可能777心入面都係咁諗，至於佢喺報章登廣告批777，何柱國否認玩針對，話自己想佢成功，「就畀啲問題佢，畀佢思考……搵到適合答案咪可以連任囉！」
咁何柱國又點睇777有冇資格連任？佢又發揮一貫暗寸本色：「佢（777）考第一嘅……我有啲嘢唔直接講啦！」之後又話：「上天喺度嘅，天都有眼嘅，既然佢（林鄭）想做，或者一隻眼開一隻眼閉都未定。」要個天「一隻眼開一隻眼閉」先可以連任到？何柱國點睇777連任不言而喻喇！
李八方