因為武漢肺炎疫情，歐霸盃8強改為1場過決勝負，去到德國中立場上演，當中曼聯禮拜一就喺科隆鬥被視為八強實力最弱嘅哥本哈根，原本以為會輕鬆過關，點知要踢到加時先由波基斯費南迪斯（B費）射入12碼以1:0小勝。雖然睇番比賽數據，紅魔可以話係全面佔上風，但哥軍門將祖漢莊臣表現神勇，救咗超多波，所以最後紅魔又係要靠12碼先贏。
雖然曼聯今場精銳盡出，不過球員就唔太入局，到上半場中段先開始企穩陣腳，食過2次詐糊同2次中柱，但90分鐘都互無紀錄。去到加時95分鐘，安東尼馬迪爾博到今季紅魔各項賽事嘅第21球12碼，成為歐洲5大聯賽博到最多12碼嘅球隊，之後就由B費操刀射入，最後就咁1:0小勝呢支丹超球隊入4強。
今場都幫紅魔射入12碼嘅B費，喺1月入魔以嚟已經射入7球12碼，而且最近四年半都未試過射失，連埋之前士砵亭嘅數據，B費已經連續入咗21球12碼。其實今場B費嘅射12碼方式都有改變，之前大家都知B費射12碼前會跳起，但今場佢就直接起跑將個波射入。連蘇B都讚呢位福將：「佢射12碼一定勁過我！」
不過，眼見紅魔今場又靠12碼贏波，相信蘇B都會想繼續增兵，只係之前一直想簽嘅查頓辛祖，睇怕已經冇乜機會加盟。因為多蒙特體育總監索克就話已經調整咗辛祖嘅人工，對方亦都同意續約至2023年。
雖然暫時未買到人，但紅魔應該都未得閒理，事關要繼續全力爭歐霸，而佢哋最大競爭對手國際米蘭，都喺同日靠尼高路巴列拿同盧卡古入波，以2:1踢走利華古遜入4強。如果紅魔同國際喺四強都贏，就會喺決賽見面，上演令人非常期待嘅夢幻對決。