呢兩日收到唔少關心，「蘋果點啊？同平時有冇唔同啊？自己小心啲？」除咗不斷聽到身邊同事講返朝早高層點同警方bargain，加埋竟然要喺非採訪時間同警方共處幾個鐘，時間過得特別漫長外，其他同平時冇乜分別，新聞還是要報，公司各人繼續為報道奔波。
朝早睇到公司公佈，叫未返工嘅員工唔好返，返緊工嘅就折返。再睇到有同事話得返佢自己一個喺公司有啲驚，驚慌之餘不忘做「守門員」，贒實同事個位，希望唔好俾人亂咁搜。不過講完唔夠30秒，警方已經封鎖晒成個desk。同事傳嚟一張相，喺公司冇乜人嘅情況下，警方繼續擴大封鎖線，甚至喺中庭拉起一條橙帶，比起衝擊更覺得憤怒。
會唔會喺起底網見到自己？
校巴停到近兩點先有番，原本12點開工，結果兩點幾先返到。未落車已見十數警車圍住蘋果大樓，返工變咗「參觀」，警方不斷畀指示：「我同事帶你去登記」、「我同事帶你去大堂」、「我同事帶你去搭𨋢」、「等我同事帶你……」，內心只有無限衝擊。幾時返自己公司要你警方帶路？幾時返自己公司要登記身份證、職員證、地址、電話號碼，甚至係填問卷？警方憑咩收集呢啲資料，而最後又會唔會喺起底網見到自己呢？
憑直播同「返工」經歷，睇到嘅係警方喺蘋果大樓喧賓奪主，想搜就搜，想走就走。李桂華就喺另一邊對住行家講「警方特別利用心機處理（新聞材料）」、「保持車流人流運作，搜查允許員工繼續工作，希望出版不會收到干擾」，多麼的諷刺，睇嚟警方國安處同警方都用同一套方式做嘢，口講一套，做就另一套。
喺中大新聞系，好多老師會同你講傳媒運作係點、警媒關係又係點樣操作，法律條線又會去到邊。不過睇返𠵱家嘅香港，每日都好似推倒緊呢啲原則。世界日日變緊，唔只新聞自由，到最後我哋好X鍾意嘅香港又變得可以幾黐線呢？諗唔通㗎啦，新聞系還是要讀、記者還是要做，算啦都係起身買份《蘋果》好過。
記於8月11日清晨5時 王靖琳