香港曾經多美好，怎可以不撐住？
62歲鄧達智（William）的時裝書拖了近十年，今年終在疫情下推出《衣路歷情》和《THROWBACK》兩本書，紀錄他40年設計師生涯。第一本出完，他卻確診武肺入院，下周第二本新書出街前夕，曾經令人驕傲的Made in Hong Kong，從此變作Made in China。鄧達智回看半世紀香港時尚起跌，由80、90年代黃金歲月，到97回歸成為全球焦點， 「2020，我哋已經去到好詭異嘅時代，經歷咗好多嘢，冇法子去想像香港時裝業未來點樣，因為疫症之後，所有秩序都要重生，一日疫情未完，時間亦都未到！」
鄧達智的訪問在上月初進行，新書及專訪本來計劃書展前出街，疫情下萬事不及預期。短短半個月內，書展取消、第二本書延期，他更中武肺入院，日日上港聞，出院後感受更深，「咁奇特嘅時間出現一件咁嘅事，感覺好奇妙。」
要數香港時裝史，近則要由60年代紡織製衣業昌盛、林鳳、十三點講起，恐怕非論文式、洋洋數萬字不足包羅。因為我們真的好鍾意香港，所以更加要珍惜走來不易的時裝路，「香港係一個好國際嘅大城市，幾十年時裝嘅波浪，我哋係同國際同起同落。」鄧達智同步見證，論盡香港時尚在不同年代的轉變，還有遊走當中、引領風潮的香港女人。
代表女性：陳寶珠、蕭芳芳
「如果要講香港時裝，要由60年代，我童年開始講起，《彩色青春》（圖）你𠵱家睇返幾俗都好，但當時真係劃時代，定義咗香港一個年代。寶珠嗰時形象，係港人企同一陣線嘅工廠妹，喺一個困難時間；芳芳呢，就係大家理想中仰慕嘅一個形象，希望生活改善，代表中產，識英文、讀書，當年佢着迷你裙、水手褲，係着得好靚嘅，個人又高，對腳又長，有齊所有條件去着。透過《飛女正傳》可以睇晒60年代香港中後期嘅時尚。」
代表女性：名模許愛蓮
「我自己認識時裝時，最深刻係許愛蓮，佢係英文虎報記者，5呎9吋，經常唔化妝，剪個bob頭。嗰時67年暴動，佢着住白恤衫、卡其褲、綠色袋，拎住毛語錄混入人群去做訪問，佢係一個好大都會女性。其實佢先係第一個華人邦女郎，70年代初，佢喺巴黎做模特兒，Sonia Rykiel拖住佢出嚟謝幕。喺我心目中，佢好有代表性，第一個華裔模特兒去到呢個層面，好難得。」
代表女性：Joyce Ma
「香港經濟去到80年代，進入黃金時代，我都係無端白事切入咗呢個黃金時代，麗晶酒店嘅ballroom係冇一晚係冇function，有時你喺lobby望一望，可能Calvin Klein喺隔籬。」他那時由Bang Bang及長江的設計工作中，開始做自己設計的晚裝，「嗰時每個月我淨係訂做晚裝嘅收入，係多過我打工三倍，香港時裝嗰時係好好做，黃金時代！80年代綜合都係靚人，朱玲玲、陳百強，好多。」
「最代表一定馬郭志清（Joyce Ma），因為佢帶領咗歐洲嘅潮流嚟香港，Joyce係唔止香港，係亞太區第一間有齊咁多國際品牌嘅綜合性嘅fashion shop，令香港時尚氣息和全世界接上、同步，Versace、Armani 、Yohji Yamamoto、Issey Miyake等，都係80、90年嘅。」
代表女性：薛芷倫、林燕妮
「9０年代面對回歸，所有國際傳媒都進駐香港，睇住香港點發生、點回歸。因為咁，全世界都關注香港，國際性exposure喺整90年代最厲害，全世界好多國家請我哋去做騷，嗰時最關注係ball gowns，嗰時真係薛芷倫（圖）時代，佢又靚，着衫又好，好有嗰個年代、要靚到最後一刻嗰種格調，真係好有代表性。」
「同一時間，97年又好多移民，留低嘅又好水漲船高，走與唔走，有好多恐懼，導致好多家變，係一個好奇特嘅時間。另一樣要講，係Giordano，佢嗰時係破天荒，將過去嗰種馬獅龍、Bang Bang 70、80年代嗰種服裝零售，張力、角度拉得更加大，個佔有率更加高，往後嘅都係跟佢，就算Uniqlo都係跟佢嘅路線咁去做。」因為享受設計，亦不想重複做晚裝，鄧達智在97年後開始摸索新出路，成為最早期的航空、港鐵、高鐵制服設計師。
代表女性：馬詩慧
「香港回歸之後，大家要面對一個好大嘅落差。2000年前，fashion係一件事，會去講；2000年之後，fashion係生活一部份。內地開始好繁盛，2003年之前，內地係冇國際品牌，對香港設計師嚟講，好有利，香港時裝發展以前嗰套，可以搬去佢哋度做，佢哋好相信香港設計師講嘅嘢。」鄧達智坦言那時享受國際設計師待遇，坐頭等機、出活動收錢、騷上出幾多套衫收幾多錢、肯謝幕另計，各類顧問費任收，當年未紅的黃曉明、范冰冰也企後排。
「當然只係短短幾年，之後佢哋培植咗本土設計師，好快出現幾代人，睇住佢哋一大堆一大堆labels咁上，但去到2014、2015年左右，就又走下波。」鄧達智說：「呢十年嘅話，我會諗起馬詩慧（Janet Ma），代表個種come back。因為佢喺80、90年代已經大紅過，當佢嘅細路大咗，佢再出返嚟，出席咁多活動都咁受人歡迎，唔使行騷，係坐喺度已經係一個氣場，佢先係KOL。」
代表女性：鄭秀文
「呢個係一個好詭異嘅時代，有網絡、有網購，加埋KOL、靠marketing嘅年代，好困局。就算你已有名氣，好似Simone Rocha，佢除非有好大嘅如LVMH嘅backup，否則都好難生存；好似做得好好嘅Cos咁，你用Cos嘅價值，去買designers做、應該貴十倍嘅嘢。疫症之後，所有秩序要重生，𠵱家疫情未過，我哋要點樣去重寫個秩序呢，時間未到呀！」至於自己40年時尚人生，他總結為「作為一個設計師，我慶幸我過咗喺設計師可以用好proper去approach fashion嘅時代，我係經歷咗。」
鄧達智坦言幾怕將自己擺上枱，「呢個係自己專業，同埋每個人都有一個理想，我𠵱家achieve到嘅嘢，離開我理想好遠，我何德何能去做呢樣嘢（回顧）呢？」拖足十年，其間寫祖家元朗的食玩鄉情都出了幾本書，今年推出兩本新書，一本由好友蕭芳芳、劉天蘭側寫鄧達智，另一本相集收錄他40年的時裝歲月。
鄧達智說：「97年前準備好一切離開香港，好朋友Jimmy Choo喺倫敦近海德公園已開workshop租定工作室，諗住兩個人一齊孖住上，有個照應，因為屋企事，返一返香港就一直留低。」世事不似預期，慶幸在今年一片渾沌中出了書，「過去一年，It’s a good time，未來會經歷啲乜，我哋都唔知道。」
更多精采時尚內容，盡在http://add.appledaily.com。