如果你要數，今年嘅十大財經驚奇，除咗係美股溶斷N次，油價跌至負數，壹傳媒（282）兩日狂升超過11倍，一齊上榜絕不為過。
以前，香港人畀人嘅印象：市儈、金錢掛帥……不過，自從上年反送中後，香港出現一種魔法師——課金師；喺最市儈嘅股票市場上，竟然有一隻股份被炒起，起因唔係因fundamental，而係emotional。
炒股，當然睇前景，但今日壹傳媒面對嘅係政治上打壓、廣告封殺，喺8月10日，警方更史無前例地派逾200警力搜查報館，仲要拉埋大股東、管理層。點知，香港呢班課金師，竟然黐線到明知壹傳媒經營面對重重困難，都要不問價，買！
噚日有朋友Cap晒圖同我講，「今日買282賺咗錢呀！」「唔係啩？你真係衝咗？」「開頭諗住純粹支持吓，點知升成倍，有得賺咪賺。」又有人同我講，「我抵受唔到10倍引誘，頭先走咗一半貨，不過會課金返蘋果1萬蚊超豪VIP訂閱版。」因為純粹感情因素，成件事，係amazing，相信喺金融歷史上，應該史無前例。
回歸之後，中國一直利用銀彈政策，希望將香港人可歸順成為「和諧的中國人」。成功嗎？或者佢哋本身，一早已經知唔得。中共中央政治局常委李瑞環，一直被視為係繼胡耀邦、趙紫陽、萬里、習仲勳後，中共又一個思想開明的領導人。佢喺1995年3月時講過一個故事，比喻中國收回香港：「一個窮老太太去市場賣祖傳的一把宜興紫砂小茶壺，起碼有200年歷史，就是不加茶葉，水中也會有茶香。有人願意以三両銀子的高價購買，豈料老太太覺得茶壺太舊，不好意思要這麽多的錢，就用水反覆清洗了。最後，買主回來一看，裏面的茶垢全洗乾凈了，便說連5錢銀子也不值了。」
正如李瑞環所說：「許多事，你不理解就不自覺，就很難把好東西堅持下來，也很難說你去掉的是好是壞。」
千頌C