馬德里體育會禮拜四就要喺葡萄牙里斯本進行嘅歐聯八強鬥RB萊比錫，不過，啱啱禮拜日馬體會就宣佈有兩名一隊成員經檢測後確診武漢肺炎，球會一開始冇公佈到佢哋身份，但後尾就再出多份聲明話中招嘅係前鋒安祖哥利亞同埋後衞維沙積高，仲話佢哋已經接受緊家居隔離。雖然目前比賽計劃如期進行，但馬體會就因為呢件事被打亂行程，要今晚先啟程去里斯本備戰。
馬體會發聲明指球隊準備前往里斯本嘅職球員按歐洲足協要求，喺上個禮拜進行武肺病毒檢測，但結果發現有兩人呈陽性反應，而呢兩個人就正正係安祖哥利亞同埋維沙積高，又係話佢哋已經接受隔離，而且係完全冇任何病徵喎。原本馬體會諗住禮拜一就會飛去里斯本備戰歐聯八強戰，但𠵱家就打亂晒球隊計劃，好彩所有職球員喺之後再次接受檢測，全部呈陰性。
由於疫情影響，歐聯最後八強改喺里斯本以一場過淘汰賽進行，而UEFA目前亦冇打算將馬體會對萊比錫嘅賽事延期進行。喺上個月，同市嘅皇家馬德里都有馬里安奴戴亞斯喺歐聯16強前確診，比賽最終都如期進行，不過兩者情況有少少唔同，當時馬里安奴係放完假先確診，但馬體會喺上禮拜五仲成隊操練緊，令人擔心病毒已經傳染咗畀其他球員，尤其家陣檢測結果成日又陰又陽咁變嚟變去，一個唔小心陰性翻發，再傳染埋畀萊比錫就麻煩喇。
喺球會未宣佈確診球員嘅時候，唔少人都估緊到底係邊個球員中招，中場湯馬士柏迪就暗示自己唔係確診者，事關佢喺球會公佈有人確診後，就上載咗自己同友人係屋企玩抖音嘅短片，變相話畀人知佢唔係隔離緊，今日將會隨隊去葡萄牙。不過，呢位加納中場一直有傳將會加盟阿仙奴，有指最近兵工廠仲希望用法國前鋒拿卡錫迪作為交易條件，打動馬體會放人，今次喺里斯本嘅歐聯之旅，好可能係湯馬士柏迪最後一次為馬體會上陣嘅賽事。
而馬體會隊長佐治高基近日接受訪問就叫球友要堅持信念：「我哋已經淘汰咗上屆嘅歐聯冠軍利物浦 ，目前我哋距離冠軍只差三場！聯賽亦由第6升上第3拎到歐聯資格，我哋一定要懷住強大嘅鬥志同熱情踢落去。」希望馬體會唔會因為今次有主力球員感染到武漢肺炎而影響到佢地發揮喇！
