祖雲達斯新帥派路啱啱新官上任，即刻收到唔少壞消息，其中一單係上年夏天以7,500萬鎊身價來投嘅20歲中堅馬菲斯迪歷特，自從去年底右肩甩骹之後，一直帶傷上陣，結果喺祖記落實歐聯出局後，迪歷特亦決定做手術根治問題，預計佢要缺陣2至3個月，最快都要11月先可以重返球場，意味九月中新季開「咧」嘅意甲，季初都唔使預佢。防線少咗位大將之餘，派路甚至可能要面對球隊當家球星基斯坦奴朗拿度（C朗）離隊，法媒話C朗嘅經理人文迪斯，將會趁歐聯八強喺葡萄牙舉行，去到里斯本同巴黎聖日耳門（PSG）嘅高層包括李安納度會面，商討有關占士洛迪古斯同C朗嘅轉會㖭！