季尾成功達陣搶到歐聯入場券嘅嘅曼聯，今季其實仲揮低咗車路士進駐埋第三位，領隊蘇斯克查就牙擦擦咁話想為曼聯捧盃喇喎，喺轉會方面當然都要落心機諗吓計。呢排同多蒙特嘅英格蘭翼鋒查頓辛祖傳出多次「緋聞」，又最後48小時又盛，但其實一直都冇乜重大進展。早前有指多蒙特定咗8月10號做賣辛祖嘅死線，而呢日咁啱亦係大軍出發去瑞士進行季前集訓嘅日子。見到禮拜一辛祖已經同其他多蒙特隊友朝早搭飛機出發咗，睇嚟曼聯都係冇乜機會㗎喇。據報多蒙特堅持要收1.08億鎊（約11億港元）先肯賣辛祖，而呢個亦係曼聯遲遲未出手嘅主要原因。而曼聯方面想盡最後努力，希望平啲買到辛祖喎；不過佢同多蒙特仲有兩年約，對後者嚟講其實就冇乜壓力急住賣佢囉。