【娛樂圖輯】慘被羞辱

早前被舊愛周揚青踢爆愛玩「多人運動」而形象破產嘅羅志祥（小豬），龜縮4個月後，噚日喺社交網貼打高球相，佢瘦到似條藤，直認跌咗超過20磅。小豬話學打高球過程中「被羞辱了好幾回。」

溫馨生日

馮素波（波姐）日前同阿仔新抱慶祝77歲生日，佢話唯一心願係將爸爸馮峰交畀佢嘅資料整理成書。而馮德倫就同老婆舒淇慶祝46歲生日，兩公婆享用簡單菜式，雖然馮德倫臉上多咗歲月痕迹，但見老婆送嘅蛋糕寫住「最帥導演」，就笑得勁甜。

母女同聲

雪梨女兒徐頴堃（Erica 左）最近開YouTube頻道做KOL，日前仲玩母女感情大挑戰，Erica被發現竟然忘記媽咪年齡，佢又大爆小時候被迫聽媽咪唱K。