一位中年朋友有子今年中學畢業，DSE放榜前來電話要同左丁山吃午飯，為佢兒子提供升學意見。到咗放榜後吃飯之日，已有二人同枱令，三人不能同枱吃飯，加上大家心理上都係有少少顧忌，於是吃飯無限延期，朋友唔等得，卒之叫個仔打電話來公司找左丁山一談。問世姪入學想讀乜，佢話成績都幾好，想話申請讀環球商業，問吓中大，港大還是科大好呢？左丁山對佢講：「今時今日仲話讀環球商業，唔好玩啦，成績咁好，最宜申請入讀三大工學院，電子電機、訊息工程、電腦、自動系統工程之類，現在炒股都係炒ATMX，美國炒FAANG，邊個仲理會摩根大通，高盛，美銀呀，更加唔好講滙豐。」世姪唔敢講落去，收線。
之後佢爸爸打電話嚟：「丁山大佬，我個仔話畀你拋窒，佢話同學成績好嗰啲都報讀計量財務，全球商業，成績差嗰啲先至讀理學院、工學院，佢驚畀同學笑喎。」左丁山對朋友講，此乃世俗之見，潮流興新經濟，興科技創意，如果讀大學為咗搵工嘅話（香港家長學生大都如此），未來最多工作機會嘅就係科技創業，唔係地產金融，睇吓滙豐，開業155年，曾權傾一時，威盡香江，而今市值只係6984億元港幣，騰訊20年前冇人識，今天市值5萬3千7百億元，等於7家滙豐。一位千億地產富豪曾對左丁山講過，佢去到矽谷，冇人尊重佢嘅一千億港元，地產商更只係特朗普之輩，缺乏尊重，Zoom去年上市，現今之市值已有5850億港元啦，創辦人袁征係1997年移民美國嘅咋。
當然，初入大學讀工科唔好發夢做馬化騰、袁征咁快，拿到學位之後，都係去打工嘅啫，初時人工未必夠高，但如有天份加創意，好快爬升，如做初創企業，接受一番歷練在市場打滾過，經驗更勝讀兩年MBA。此外，不可不知，如果仍然想做銀行工，工程學位畢業生有大把機會，入到銀行，做不同部門，一些銀行請工科生，多過請商科生！大把史丹福工科生係入華爾街三四年，再出外創業致富嘅。讀工科進可攻，退可守，適當時候有錢有時間讀多一個MBA，加埋已有B. Eng，係21世紀上佳學位組合，一定砌贏BBA加MBA。
朋友聽完，半信半疑，要再同兒子講，轉為申請讀三大工程學院。講完咁啱住在九肚山嘅一位朋友（40歲左右），來電講其他事情，佢係電腦系統保安專家，呢排生意好到不得了。左丁山靈機一動問佢：「你以前讀邊科㗎？」佢話：「當年讀化學工程，比較冷門，幾易入！」