車路士啱啱喺上禮拜六嘅歐聯16強次回合作客以1:4不敵拜仁慕尼黑，2回合總計輸足1:7出局。通常輸波後都要搵啲嘢去發洩吓，尤其輸咗場咁重要嘅比賽，車仔中場赫臣奧杜爾就喺賽後12個鐘頭後，現身喺倫敦踢一啲俗稱「周日聯賽」嘅業餘比賽，就睇得出佢幾咁餓波。19歲嘅奧杜爾喺歐聯次回合正選上陣，可惜最後都係冇辦法幫球隊挽回劣勢。賽後佢由德國飛返家鄉倫敦，歐聯喺當地時間九點幾踢完，但第朝10點半就見到佢出現喺一場Saha FC對Lambeth Allstars FC嘅友誼波度登場，呢場比賽係南倫敦克羅伊登打擊持刀犯罪嘅活動之一。可惜，奧杜爾連友誼波都輸埋，佢代表嘅Saha FC隊以3:5輸波，但佢喺網上話好榮幸幫手打擊罪案，仲喺比賽見番唔少老友。