港男出身的麥凱程（Alex）多月前忽然「失蹤」，有指因去年尾參加反修例遊行被捕，最終被無綫out走。但原來Alex是因去年社運及警暴，令他患上嚴重抑鬱症，他擔心出街被警截查，惶恐度日。返回老家法國的Alex仍未康復，但不忘祝福港人不久將來，可以再次大啖呼吸自由空氣。
撰文：寶妮
麥凱程在5月播出的重頭劇《降魔的2.0》中首次擔演要角「施勞斯」，但他卻全程「失蹤」沒有參與宣傳活動，及後盛傳Alex去年尾因參與反修例遊行被捕，隨即被雪藏，而他即避走回法國老家，6月時Alex的相片便在無綫官方藝員表中消失。目前身在家鄉波多爾的Alex接受《蘋果》電話訪問，開腔道出事件因由：「我係去年11月中返咗嚟法國，從來冇發生過參加遊行被捕呢件事。我點解走，係因為我得咗好嚴重嘅抑鬱症。之前我冇情緒病，但可能我做呢行；自己又小朋友，同埋香港2019年發生咁多事，令到我覺得香港氣氛變咗，冇諗過咁靚咁多機會發展嘅地方變到好灰，令我好驚、好抑鬱，好多嘢唔敢講唔敢做。」
除了社會環境突變，Alex在《降》劇中有個孖生家姐「施萊斯」死去，那刻他似乎未能抽離角色；心想若香港出事隨時可能跟家人永別，因此他即想回家見媽咪及胞妹，他透露：「當時情緒好唔穩定，根本perform唔到，日日睇新聞咁多暴力，我好驚喺街，怕有事會發生，冇安全感。一直覺得香港係好安全，警察係好嘅，會令香港安全，但去年發生咁多事，對佢哋印象改變，好驚，見咁多暴力，驚咗佢哋，甚至睇新聞會喊。」雖然Alex在街見警察未至於立即轉頭走，但他坦言因自己有紋身，身材健碩，因此若見警察會特別留意他們對自己有沒有任何舉動。若果可以跟香港3萬警察說一句話，Alex只想問：「大家自己人，點解呢？」
Alex當時病情不輕，只想立即回法國，因此事前並無通知無綫及家人，他坦言：「咁公司唔明，其實我都唔明自己發生乜嘢事，我當時係好驚人；唔想同人溝通，唔想用電話，只係一心想見屋企人。」返回老家後Alex亦因病情未有即時跟公司溝通，無故曠工下最終被解約，Alex沒有後悔：「因為我真係需要去冷靜同recharge，返去熟悉地方及有安全感嘅地方搵返自己。不過今次都畀咗個機會了解自己更多，亦了解公司深層啲，係好事。」
無綫不明文規定嚴禁藝人涉及政治，Alex當然知道：「雖然我冇去，但個心係同香港人遊行，工作上唔畀我咁做，喺法國嘅公司可以畀員工去參加，如果係我會去。我支持香港人追求嘅目的，因我喺法國長大，價值觀中一定有自由、平等及博愛，但去年香港就變成少咗自由嘅地方，咁大差別令人好灰。」
現在香港更有港區國安法，進一步剝削港人自由，不少港人再萌移民念頭，相信很多人此刻也羨慕Alex有法國國籍：「今次返嚟都覺得有法國人嘅身份係好幸福嘅事，可以返嚟一個平靜有愛，冇咁多暴力嘅地方。」當然每個國家施政也會有令市民不滿示威之處，近年法國亦常見，但Alex慶幸在法國的生活最終可回復正常，不會有香港出現的落差。最後Alex亦想將來可再來港尋機會，笑言希望有機會拍《降魔的3.0》，而他最希望是香港可以變回又靚又平靜及充滿自由的地方。