警方噚日高調搜查壹傳媒，嚴重踐踏新聞自由，「收工男」傅振中諗住嚟「助興」食花生，點知就食咗張599G限聚令告票，盛惠2,000大元，留低金句「我嚟撐你，你哋告我？」發生乜事？等當時喺蘋果大樓嘅八方足本直擊。
收工男：我嚟撐你，你哋告我？
事緣收工男帶咗最少八個阿叔阿嬸嚟壹傳媒大樓踩場，仲拎咗橫額、香檳同花炮，打算慶祝黎智英被捕。其實收工男都知會受制於限聚令，所以只有另外兩個自稱係藍絲嘅市民負責開香檳同放花炮，不過佢哋咁高調現身，在場又咁多鏡頭影住，警察唔想做嘢都逼住要做嘢啦，要求佢哋清返啲花炮垃圾，一眾藍絲乖乖跟從。
誰不知執垃圾途中，警方開咪話佢哋已經違反咗限聚令，要票控佢哋，警員又話佢哋呢大批市民有共同目的，要發出勸籲，但先安排其他幾個人行過對面馬路，之後返上警車上拎告票，登記兩個執垃圾嘅藍絲個人資料同發告票，票控佢哋觸犯第599G章《預防及控制疾病（禁止群組聚集）規例》。兩個「藍絲」市民儍頭儍腦，仲以為有警員撐腰，點知最後被票控。
可能心情大起大跌得太厲害，傅振中面露尷尬神情，垂頭喪氣，仲反問警員「我嚟撐你，你哋告我？」但警察公共關係科警司高振邦就話唔識佢，又質問佢係咪記者，唔係就好走，仲話佢哋好似係一齊。收工男怕又食告票，立即同其他人離開現場，但始終難逃一劫，行過對面馬路之後，又被警員發現同票控，佢之後同傳媒講，自己係無奈接受票控。近來五毛cut budget，大拿拿2,000蚊，唔怪得收工男個樣咁「頻能」啦。
李八方