警方昨晨以違反港區國安法拘捕壹傳媒創辦人黎智英、其次子黎耀恩，以及多名壹傳媒高層，更出動約200名警員，以搜證為由進駐壹傳媒集團在將軍澳工業邨大樓。不少藝人怒轟警方此舉屬打壓新聞自由，何韻詩力斥荒謬：「做show咁做。」王喜則表示撐硬《蘋果》：「白紙都買」。
香港警務處昨晨以涉嫌違反港區國安法第29條的「勾結外國勢力」及其他罪名，拘捕壹傳媒創辦人黎智英、黎智英次子黎耀恩及多名壹傳媒高層。約200名警員在昨早10時，進入將軍澳壹傳媒大樓搜查，事件震驚全港。大班勇於發聲的藝人都指摘警方行動，何韻詩力斥荒謬，她和黃耀明分別在社交網貼大批警員進入壹傳媒大樓搜查的相片，阿詩留言：「荒謬到唔識評論，真係做show咁做，過百dancer。」之後阿詩又指：「係咁意買咗幾手282（壹傳媒股票代號）。肥佬黎加油，壹傳媒加油！」
王喜昨午在fb呼籲港人支持訂閱《蘋果》，他轉載留言指撐《蘋果》：「歷史高峯1日賣50萬份，話畀香港蘋果日報知，聽日印50萬份，夠唔夠？」他自己又寫上：「白紙都買」。對於壹傳媒大樓被搜，他回覆《蘋果》表示：「恭喜嗰二百幾個差人，今日係佢哋成世人最接近真相嘅一日。」至於黎智英被捕，他則說：「真理必勝，正義長存。」
杜汶澤以短訊回應《蘋果》︰「我諗真係唔係咁多人去過《蘋果》，啲警員去咗咪參觀吓囉，難得有機會睇吓都好。」不過他呼籲《蘋果》員工要小心財物，他話：「睇睇枱頭有冇唔見嘢，之前有檔非法賭檔，被人冚檔，都好似俾人偷咗副麻雀呀。」他提議下次知道有警員來調查時，最好先閂冷氣，因為《蘋果》冷氣出名好凍，他說︰「你知佢哋慣咗出面做嘢好熱，突然間去到冷氣咁大地方，驚凍親佢哋，醒目就熄咗冷氣。」黃秋生則以簡短四字「無話可說」回應警察搜查《蘋果》。
曾志豪在網上表示有幸能為《蘋果》寫專欄，他以短訊回覆：「無話可說了，專制起訴自由，言者無罪。」曾在《導火新聞線》演記者的王宗堯貼出該劇劇照，並留言指憤怒，怒斥打壓新聞自由，又發帖轉載：「買蘋果日報，就算得返白紙都要支持。」商台前DJ Leo則表示：「估唔到除咗空白memo紙，仲有白色報紙，大家一樣睇到上面寫咗乜。」他又揶揄警方：「成班人好似扮摷嘢咁，扮工真係好辛苦。」無綫前小花林泳淘則表示：「多謝政府一次又一次地教育香港人，自由無價。」
袁彌明爸爸袁弓夷昨日在網上接受傳媒訪問，表示同情黎智英及《蘋果》員工，不過他指今次事件對於攬炒派來說是好事：「證明畀全世界睇，中共係講一套做一套，信用破產，一直都係得個講字。」並指將來去到國際法庭，這是破壞新聞自由的證據，他又指這不像是北京下的命令，似是香港政府為了報仇被制裁，找黎智英出氣。
已移民加拿大的鄭敬基昨日接受《蘋果》電話訪問表示：「好嬲！好擔心咁不公義行動會令香港變成點，亦好擔心黎生一家，佢為香港盡咗咁大努力，冇因為呢啲打壓試圖離開，佢有條件離開。冇咗《蘋果》會點？好困擾，世界變咗黑色。」阮民安亦在電話中力撐《蘋果》：「用200警力爆一間傳媒機構，我覺得係國際笑話，睇嚟中共冇乜棋，好感謝黎生同《蘋果》所有手足堅持，相信香港人好快見到曙光。」
無綫前記者柳俊江在社交網撰文：「肥佬黎被捕，一早已經寫在國安法劇本之中。」他指控警方所謂的「搜證」，實際上只是要癱瘓壹傳媒運作：「除去這個意識形態的大敵人，向上交差，就是平定香港民心的大功勞。」填詞人梁栢堅則揶揄梁振英：「689以後冇生果食點算？老坑會便秘。」編劇莊梅岩則貼文揶揄：「相傳黎智英勾結美帝勢力的證據就是蘋果日報同iPhone的logo太相似。」又轉貼寫上「為了民主自由，你我齊上齊落，人人手持一果，大家同撐智英！」的圖片力撐《蘋果》。
