祖雲達斯喺上周五歐聯出局，翌日就炒咗教練沙利，當時外界傳過前熱刺主帥普捷天奴係接任人選大熱，就連前度主帥艾基利、施丹同干地等人都被拉上關係。但令人意外嘅係，祖記最終決定由過去毫無執教經驗、上星期先接手祖記U23嘅派路接手做一隊教練。
41歲嘅派路喺球員時代曾效力過國際米蘭、AC米蘭同祖雲達斯3大意甲豪門，佢喺2011年加盟祖記起就幫球隊連贏4屆聯賽冠軍，到15年離隊轉投美職聯紐約城，喺17年就掛咗靴。11日前佢亦都正式展開執教生涯，接手祖雲達斯U23主帥教職，但相信佢自己都估唔到，唔使兩個禮拜就「升職」教一隊。
雖然派路冇執教經驗，但近年唔少球隊請番佢哋嘅名將教波，英超就有車路士嘅林柏特同阿仙奴嘅阿迪達，第一次坐正嘅阿迪達仲幫槍手贏咗個英足盃。講到更成功嘅例子，就有08年出任巴塞隆拿主帥嘅哥迪奧拿，短短任教4年就為巴塞贏咗3次西甲同2次歐聯等重要錦標；而同派路一樣踢過祖記嘅施丹喺16年初走馬上任後，即刻帶領皇家馬德里連贏三屆歐聯，佢喺今季回歸亦幫皇馬重奪西甲。
不過哥帥同施丹喺接手一隊嗰陣，好歹都喺球隊嘅B隊教過波，但係只得11日執教祖記U23經驗嘅派路，相信首先要同陣中兩位老大哥打好關係，第一位係35歲嘅基斯坦奴朗拿度（C朗），佢喺歐聯出局嘅賽後喺ig發長文，好似抒發咗對沙利嘅不滿，成篇文冇提過沙利之餘，最後仲要話：「希望我哋喺短假期後為未來作出最好決定。」好似暗示祖記揀錯沙利。至於第二位就係仲大派路一歲嘅門神保方，派路當然要靠呢位老大哥打好更衣室嘅關係。其實保方都好支持派路，得知老友上任消息後仲講笑話：「我係咪要叫你教練喇派路？祝你好運！」
喺意大利06年世盃冠軍隊入面，派路有唔少隊友都執起教鞭，好似兩位米蘭好拍檔恩沙基同尼斯達去季都教意乙球隊。恩沙基教意乙嘅賓尼雲圖贏咗聯賽冠軍兼來季會升上意甲；而喺美國開始教波嘅尼斯達，亦帶領緊費辛隆尼打緊升班附加賽，有望升上意甲。另一鐵衞格羅素教過祖記青年軍三年，但之後教維羅納同布雷西亞都唔理想，上年俾布雷西亞炒咗之後就未有再教波住。教得算唔錯嘅就有「大簡」簡拿華路同加度素，前者帶領恒大贏咗19年嘅中超冠軍，加度素就喺13年開始執起教鞭，雖然之前教米蘭唔算好好，但佢帶領嘅拿玻里勝率有55%，算係佢執教生涯最好嘅成績。