中港官員求仁得仁，有11個做咗「先頭部隊」，被網民形容變成「共海豪情之Sanction’s Eleven」，齊上齊落被美國制裁。佢哋會受到咩影響，仲要留待下回分解，不過最先出現嘅影響，係身份證同護照號碼等個人資料俾美國公開，連帶出入境美國紀錄都因為咁一覽無遺，私隱專員公署隨即出稿為佢哋出頭，不過唔出猶自可，呢份稿一出，反而更加嚇死被美國制裁嘅人！
申簽證表格列明資料可用於執法
對《蘋果》記者被起底無能為力嘅私隱專員公署，今次連林鄭都幫唔到手，公開回應話呢個係美國聯邦公報（Federal Register）發出嘅行政命令，猶如香港政府嘅憲報，「沒有由第三方要求移除內容的餘地」，所以只能夠訴諸「數據道德」指摘美國財政部，令人十分失望喎！不過好快有網民發現，公署新聞稿嘅最初版本將美國行政命令個英文「Executive Order」寫咗做「Execution Order（行刑命令）」，原本美國都係唔畀入境、凍結資產、甚至冇銀行肯做佢哋生意啫，點知私隱署寫到要攞命，究竟係手民之誤，定其實係暗示制裁嘅真正威力先？
至於777公開回應美國制裁時就訴諸人權，話美國將佢申請簽證啲個人資料畀財政部門，係違反人權保障，值得商榷；但八方睇返申請美國簽證表格，其實寫到明填寫嘅資料可以喺執行美國法律時使用，咁美國根據當地新法律《香港自治法》執行制裁，777如果真係要怪，似乎就要怪自己做乜去美國啦！
李八方