中銀、怡和、京東數科聯手推出的Livi Bank，最快周三搶閘開業，屆時三位股東將會廣發「邀請碼」，比拼吸客力。
杜夫人收到風，銀行初步會推出幾個「邀請碼」，三方股東各自擁有一個碼，方便內部「mark人頭」，兼比較股東吸客力；另外亦設有幾個「世界code」畀街客願者上釣。
中銀勝在有銀行營運經驗兼客底多，但，行方又無理由想現有客戶流向Livi啫？搞得虛銀，緊係想吸新客啦！
怡和英資定位就略勝一籌，集團旗下食肆、連鎖商店多，生態圈有一定深度及闊度。怡和最近夥拍牛奶公司搞積分獎賞計劃，前日萬寧推折扣優惠，買滿指定金額用yuu儲分仲可以減30蚊。單憑香港人「唔好蝕」嘅DNA，夫人相信，下載yuu呢個app者眾，怡和要跑數真係易如反掌。
至於京東數科，科技上幫到手啩？或者銀行下一步可以做埋大灣區客，京東有機會發揮到更大作用嘅。
要令客戶心甘情願試用虛銀服務，都要視乎內容有幾正。據講，Livi無高息定期、不設高回贈實體卡，活期存款年利率0.5%，似乎比三間已正式推出的虛銀輸蝕。唯一優勝，就係提供QR Code支付服務，總之，無競爭力；至於「例牌」的MGM（member get member）計劃，都只係推介新客有100蚊，另加抽獎咋。講到介面、用戶體驗，就要試過先再同大家分享。
Livi早前整咗個Waitlist，叫人預先登記，計埋要收料嘅行家、記者，據聞只得幾千人咋。分享多個小插曲，原先銀行計劃電郵hyperlink畀班客仔，要求佢哋點擊超連結並留低個人資料，以便獲得「邀請碼」，坐定粒六等金管局開綠燈，殊不知當局擔心出現網絡釣魚風險（phishing），落閘唔畀做。
眼見明明綠燈變成紅燈，正所謂人急生智，上頭即刻落指示變陣，目標係順延至呢個星期正式推出市場。花生友起初仲講笑，話Livi同富融銀行爭包尾，不過CEO孫大威上場後，戰鬥力、執行力大增，果然不負股東所望。
杜夫人