大衛施華同曼城嘅合約喺今屆歐聯賽事結束之後就屆滿，佢勢將離開效力咗10年嘅藍月亮。雖然據報佢獲得嚟自美職聯同西班牙方面嘅報價，但有多間意大利傳媒都報道，呢位西班牙中場今日就會同意甲嘅拉素簽約三年。大衛施華老竇費蘭度之前就曾經話過，34歲嘅大衛施華鍾意意甲同埋享受喺意大利踢波︰「佢同我講可以喺嗰度踢到40歲。」費蘭度仲話，大衛施華如果揀拉素佢會好開心，因為呢個係佢嘅一大機會。拉素今季喺意甲以第四名完成，拎到20/21球季歐聯分組賽席位，據稱亦係呢單交易能夠達成嘅關鍵。報道亦估計，拉素會為大衛施華提供可觀薪酬同一系列福利，包括可以搭私人飛機到西班牙探屋企人。