楊潤雄局長講九月開學不返學，眾多校長、家長、教師聽到一嚿雲，諗一輪至知道楊局長講乜，原來即係學校學期正式開始，但學生不用回校上課，而須在家中接受網上授課，功課照做，倚賴電腦與平板電腦進行，不過楊局長又加了一句，幼小學生多睇電腦，對眼睛冇益。
真係官字兩個口，楊局長講晒，用電腦上課，一日數小時，算唔算多呀？一年後香港眼科醫生與眼鏡舖生意大增，是可斷言，唔知教育局會唔會每間學校撥款做學生、老師護眼醫療津貼呢？
學生回校上課，老師面授，學生學習與同學共同生活，交往，係人生教育一個重要部份，如果一味靠Zoom，全部on-line課程，所有甚麼德智體群美之教育理念可以丟落垃圾桶。每一間學校或有不同教育理念，例如肥仔K個女獲派入W學校一年級，W學校強調注重學生健康，在校飲食有嚴格規定，每星期學生要多做運動。哎吔，全部在家上課，學生一路睇住電腦，一路食餅乾，乜嘢學校教育理念都難以實現啦。
小學校長X未放暑假時已用Zoom為學生上課，搞到頭昏腦脹，據佢綜合過往幾個月嘅教學經驗，所有老師都話學生唔夠attention，小孩子睇電腦半小時就逐漸失控。教師亦然，成日教書對住電腦，教師好易眼睛疲倦。校長X特別恐怕升小一嘅學生，唔駛返回學校，不認識同班同學，老師亦唔知學生係邊個打邊個，根本難以因材施教。如學生在小一，小二嘅學習基礎唔好，以後就讀得更辛苦。校長X亦發覺全日24班一齊網上授課嘅話，學校嘅寬頻根本唔夠用，IT技術問題多籮籮，呢樣係楊局長完全冇理會嘅，校長亦收過家長投訴，家有兩小孩上課要平板電腦兩部，一齊上課，家中寬頻有問題，至於基層家長更不知所措，家中寬頻唔夠，電腦唔夠，父母返工，阿婆完全唔識上網，硬晒軚！還有一對夫婦皆是教師，有仔有女，一家總共要用四部電腦同時授課、上課（因老師可以WFH），家裏更加混亂
此乃世界性問題，世衛組織警告，因學校停課，全世界有十億學童受影響，不能接受正常教育。加上貧富懸殊，富裕家庭子女在電腦，在寬頻，在全日上補習方面，條件遠勝清貧兒童，會造成持續性跨代貧窮。COVID疫情唔止影響短期身體健康，以後數十年嘅社會健康亦受到破壞。求神拜佛上天保佑，神仙特效藥快啲面世啦！