美帝公佈咗第一波制裁名單，有人歡喜有人愁，喜嘅原因可以係冇份，但愁嘅原因都一樣可以因為冇份，反映愛國不足忠誠欠奉，所以無緣上榜嘅行會成員兼新民黨主席葉劉淑儀，唔知係咪因為咁，要加多幾分肉緊譴責美國，話自己非常憤怒，批評美國橫蠻無理，唔知幫唔幫到佢打入下一轉名單啦！
翻舊賬笑葉劉預言冇制裁
不時喺社交媒體明寸暗諷葉劉嘅田北俊噚晚又再出手，翻葉劉舊賬搵返佢今年3月嘅舊聞，當時葉劉聲大大話睇唔到香港會被制裁，田少就留言話「信佢一成，雙目失明」，然後加咗個鬼公仔emoji喺尾，仲hashtag「#報流料俾阿爺有咩後果㗎？」
田少成日關注葉劉，有網民就非常心水清，留言話「我開始懷疑田少你暗戀葉瘤（劉）」，點知竟然獲得田少親自回應，留言仲令大家意想不到，話「我自己都開始懷疑」，搞到其他網民好擔心，認為呢個會令田少人生陰暗面暴增，甚至驚佢有啲自毀傾向。