牙買加飛人保特喺2017年結束田徑運動員生涯後，喺18年曾經跟過澳職嘅中岸水手試訓六個禮拜，但最終都係做唔成職業足球員。雖然最近保特已經榮升咗做爸爸，仲享受緊唔使日日做運動嘅hea爆生活，但保特諗番起嗰陣試訓失敗嘅原因就話：「我覺得我冇得到一個公平嘅機會囉，我冇得按照自己嘅方式去踢波，有時候啲嘢就係冇咁順攤。不過老實講，我真係好鍾意踢波。」保特又講到，雖然自己喺中岸水手踢唔成波，但就收到唔少人嘅邀請喎：「之前我接到好多人電話，佢哋都問我係咪想踢番波，但過咗一段時間後我都覺得自己年紀都大喇，就好似你哋所講，我老喇。再講我𠵱家要湊女，淨係睇住佢都已經有排我忙啦。」