TikTok（中文：抖音）短頻道已經聞名世界，加上特朗普聲言封殺，更加紅上加紅，左丁山屬老嘢一派，從未上過TikTok，但久唔久就收到朋友傳來抖音（中國版本）嘅內地惡作劇超短視頻，多屬粵語殘片時代嘅古老惹笑動作（例如男人掛住睇露肚皮少女，撞埋電燈柱），只屬麻甩佬大媽或少年人趣味，左丁山一見即刪，全無興趣。有泰國朋友乳名叫Tok，兩位家姐，阿Tuk，阿Tik，三姊弟就係Tuk Tik Tok（泰文發音：篤的dog），幾趣緻，曾問過佢地泰文的意思，阿Tok答：冇意思嘅，只係家裏時鐘時針擺動嘅三個音節，阿媽貪簡單易記，就叫我地「篤的dog」。
估唔到幾十年後，TikTok聞名全球，有早知嘅話，佢地一早將乳名註冊專利，或者會搵到銀！邊啲人睇TikTok，成為熱心用戶呢？抖音公司自己透露，85%註冊用戶在24歲以下（即1996年後出世），其中又有大部份係千禧後。呢日左丁山在家中講起邊個睇過用過TikTok，估唔到竟然係七歲孫女，佢話：「我睇過，花姐姐（照顧孫女之菲傭）有同其他姐姐玩，佢畀我睇過，佢有一次用手機拍切蘋果畀我食，切親手指流血，post上TikTok了。」吓，切親手指，點解唔講㗎？孫女話：「作狀嘅咋，好玩吖嘛，花姐姐話同朋友開玩笑喎！」
唔怪得TikTok咁鬼紅，孫女與菲傭皆為擁躉。左丁山早過楊潤雄好耐，知道小童多睇電話會傷眼，家中嚴禁孫女孫兒開iPad、手機及電腦，叫佢地讀紙本書，多讀文字版本，但在日間又係好難完全禁絕菲傭與孫女用菲傭嘅手機睇TikTok嘅。特朗普知道TikTok對美國青年人有巨大影響，不利選情，再加上大打反華牌，於是封殺TikTok，呢張係一張好牌，一來阻止美國用戶個人資料外洩中國，二來可報復中國官方封殺Google、Facebook，三來可防止TikTok年輕人串連反特朗普，最後仲諗到可迫使TikTok賣盤畀美國企業（現在微軟想買）！TikTok之原罪就係源於中國，中國人張一鳴係大老闆，隨時受命於CCP，此乃中資企業衝出海外之最大障礙！