英超19/20球季終告一段落，賽會喺上禮拜五就公佈咗兩個最佳球員選舉名單，分別係球季最佳球員同最佳年青球員選舉。利物浦三子佐敦軒達臣、阿歷山大阿諾特、沙迪奧文尼將會同曼城嘅奇雲迪布尼爭最佳球員嘅寶座。而今季只有前4嘅曼聯亦有3位球員爭吓「BB凳」，角逐球季最佳年輕球員。
賽會為今季最佳球員定出最後七強，贏得球隊首個英超冠軍嘅利物浦最威水，共有三位球員入圍。雖然上屆得主華基爾雲迪積克冇份，不過隊長佐敦軒達臣一定係七位球員之中嘅大熱門，事關佢早前已經當選咗英格蘭足球記者協會（FWA）年度最佳球員，亦係球隊嘅無名英雄，同時亦係領隊高普之外嘅精神領袖。
右閘阿諾特今季以13次助攻，打破自己所保持嘅英超後衞助攻紀錄，今季佢38場聯賽全勤，21歲嘅佢仲有份角逐球季最佳年輕球員嘅候選人；翼鋒文尼今季交出18入球同9次助攻，絕對係紅軍前場嘅一把尖刀，賽會仲話今季佢曾經五次為紅軍射入關鍵致勝球，可見佢嘅入波含金量相當高。
曼城嘅奇雲迪布尼就被譽為係紅軍三子以外，另一位大熱人選。喺早前FWA球員先生頒獎後，已經有唔少人認為迪布尼先係今季英超最佳球員。呢位比利時中場今季交出20次助攻，追平咗亨利喺02/03球季所創造嘅紀錄。呢位英超助攻王今季亦射入13個聯賽入球，連領隊哥迪奧拿都大讚佢係世界最佳中場。
其餘三位候選人分別係李斯特城嘅占美華迪、修咸頓嘅丹尼艾格斯同般尼門將尼克普比。前兩位英格蘭前鋒今季盡顯射手本色，分別以23同22球排英超神射手榜嘅頭兩位；普比仲勁，雖然佢少過金手套獎得主、曼城門將艾達臣摩拉斯嘅16次清白身1次，但今季有成120次撲救，比艾達臣足足多52次，壓過對方成功入圍。
至於英超最佳年青球員選舉，同樣喺上禮拜五公佈咗最後八強，曼聯進攻三叉戟拉舒福特、安東尼馬迪爾及格連活特都有份入圍，剩低嘅分別有車路士孖寶美臣蒙特同基斯甸普列錫、曼聯借至錫菲聯嘅門將甸恩軒達臣同阿士東維拉隊長基亞利殊。
不過，球員入圍條件係開季前年齡要喺23歲以下，但馬迪爾同基亞利殊季前已經24歲，令名單引嚟質疑，更有球迷認為阿仙奴18歲小將布卡約沙卡，同21歲韋斯咸中場迪格蘭賴斯等仲值得入選！