烏拉圭射手卡雲尼今年6月30日同PSG完約，回復自由身，直到𠵱家都未有佢加盟新球會嘅消息，今個禮拜呢位33歲嘅前鋒喺ig發佈咗自己喺健身室嘅訓練片仲寫住：「繼續衝」。片入面佢赤裸上身舉重，喺教練嘅指導下做唔同訓練，睇得出佢身形都幾Fit。卡雲尼其實今年都已經同唔少球會扯上關係，早喺一月，已經有指卡雲尼已經同馬德里體育會達成咗轉會協議，可惜當時PSG唔放人令交易告吹。早前又有傳佢已經同葡超嘅賓菲加簽約兩年，但球隊發聲明話係失實報道喎。不過，最近又有指下季升返上英超嘅列斯聯對呢位自由身嘅前鋒相當有興趣，連球會班主都話：「卡雲尼嘅能力同身體素質都好啱我哋，雖然我未同領隊傾過，但卡雲尼絕對係我哋考慮對象之一。」