雨僑才剛過35歲生日，兩年前她嫁給年輕一歲的羅力威，兩人昨日升呢做父母，羅力威前晚在Ig預告老婆翌日入產房剖腹生B，雨僑昨日向《蘋果》報喜誕下重6磅囡囡Harper，母女平安，雨僑笑言又心思思想生第二胎。
雨僑在疫情下陀B，大部份時間足不出戶，昨日成功「卸貨」，她昨日接受訪問時說：「今朝啱啱生咗，我哋都好開心。」疫情下生B，醫院有特別安排，雨僑續說：「以前冇諗過嘅就係疫情下生小朋友，因為老公要入產房陪產，我同佢都要做咗深喉唾液測試先可以入院，陪產員生完都立即走，醫院仲規定午飯、晚飯兩段時間先可以嚟送飯時陪一陣，老公親人唔可以長時間喺房陪伴，同我預想中唔同，老公都係唔可以陪喺身邊。好彩今朝我都順利，精神各樣都好好，姑娘喺我生完立即畀我skin to skin抱BB，將佢黐住我心口，大家赤裸裸黐住，我好開心。」
問到雨僑心急追仔嗎？她笑言：「啲人話一『卸貨』，搞掂晒就忘記晒所有嘢，就諗住生第二個，我都有少少㗎，生B原來咁一回事，可以接受，我都想再生，不過冇話一定要追仔，我覺得小朋友生兩個嘅話，佢哋有照應。」
雨僑懷胎時有做瑜伽，身形沒肥腫，昨早產後在產房拍照留念時，即使素顏都上鏡，囡囡Harper精靈可愛，她說：「我覺得囡囡似爸爸多啲，英文名都係爸爸改嘅，生女其實幾好，女仔較顧家。」羅力威稱沒有特別獎勵太太，不過特意為妻女買車：「因為疫情關係，帽同口罩都冇適合BB嘅size，BB又唔可以遮塊面。始終𠵱家嘅交通工具我哋都唔係超級放心，買架車就會安全啲、安心啲。」