中共中央政治局講內循環，其實簡單啲講就係提高內部消費（內需），經濟結構轉型，昨日講及中國2019年GDP高達99萬億元人民幣，C（內需）佔38.79%，即38.4萬億元；I（投資）佔43.08%，即42.65萬億；G（政府開支）佔16.64%，即16.67萬億；I份數偏高，甚多水份，在內蒙古有不少「鬼城」，即冇人住嘅大屋，但亂咁起樓屬於投資類，對GDP有貢獻，實際上投資回報率好低，等於燒銀紙。不過，直接燒掉十億元紙幣係全無價值嘅浪費，但亂花十億元紙幣在沙漠起樓，冇人住，就叫做投資，對GDP增長有貢獻。
38.4萬億元消費，是甚麼概念？中國有14億人，即人均消費27428元，2019年人均GDP係10276美元，以七算計，係71932元人民幣，即係人均消費佔人均GDP嘅38.1%，高定低呀？
中國人儲蓄率全世界最高，IMF 2017年數字係47%，遠高於世界平均26.5%，按中國統計數字，過往儲蓄率最低係1962年嘅16.5%，1962年係壞時年，老香港就知道當年廣東人攀山越嶺而來，偷渡來港，今日不少香港廠家富豪就係1962年嘅偷渡客。儲蓄最高峰係2010年嘅50%，1952-2019平均儲蓄率係36%。
假設人人交稅，中國人民將人均GDP 38.1%消費掉，36%儲蓄，已消耗共74.1%，剩下嘅交稅差唔多嘞。可以由此引伸，中國人儲蓄率奇高，中共要引誘人民多消費，首先要誘導人民降低儲蓄，呢件係社會工程大事，並非甚麼「家電下鄉」，「放寬買車」，「銀行降低消費貸款利率」等等便可以達到目標嘅。要問儲蓄咁多做乜？當然與民族性有關，我地自幼讀書，就係讀「粒粒皆辛苦」，食物得來不易，銀紙要慳啲使，要教中國人改變根深柢固嘅想法，先使未來錢，學足美國人咁消費，直情要搞一場消費文化大革命，另外今天中國人儲埋咁多，另有理由，為退休，為醫療，為子女教育，呢三項係大數支出，必須未雨綢繆，自識得賺錢之年起，就要儲蓄為未來。
習近平提出國內大循環，改革經濟結構，增加內需，說易行難，中國的經濟智囊，如能設法把人民平均儲蓄36%降低至25%，內循環推動經濟有望了！唔講改革退休、醫療與教育，猛講刺激消費，只係嘥氣。