停擺咗一段時間嘅歐洲賽，終於喺禮拜三回歸。其中英超班霸曼聯喺歐霸盃16強次回合，主場2:1反勝寧斯，總比數大勝7:1成功晉身8強。成年入得一球嘅連格，好威水咁繼英超煞科戰之後連續兩場有「士哥」，但係一向鍾意對班紅魔後輩評頭品足嘅名宿史高斯，賽後又將矛頭直指連格，話佢咁嘅表現只係可以踢副選，認真慘情。紅魔球迷下季仲見唔見到連格真係好難講，但就一定唔會見到阿歷斯山齊士，呢位英超最高薪球員上季借咗去意甲國際米蘭，禮拜四正式落實轉投後者，周薪由50萬鎊勁減超過7成到稅後13萬鎊（約132萬港元）。
因為首回合已經作客大炒五粒，所以紅魔返到主場派上大量副選上陣，恩哈路、連格同桑馬達都正選上陣，上半場兩隊互無紀錄，不過換邊後嘅15分鐘，寧斯後衞韋辛格喺禁區外一腳遠射收死羅美路，幫客隊先開紀錄。落後嘅紅魔兩分鐘之後火速追平，馬達先交出一記直線畀連格單刀射入，再喺88分鐘助攻後備入替嘅安東尼馬迪爾再入一球，成功2:1反勝寧斯，兩回合計以7:1晉級，八強會對哥本哈根。
今場成功為紅魔射入扳平一球嘅中場「連美斯」，亦都係繼英超煞科戰鬥李斯特城之後，連續兩場波有「士哥」，要知道佢上一次連續兩場入波，已經係2018年嘅事。不過賽後史高斯都係鬧爆連格，仲話佢唔夠班踢紅魔：「最近連格嘅表現真係一般，如果曼聯想贏冠軍嘅話，佢會唔會係正選11人？我唔覺得佢係。不過今場波佢只係踢得60分鐘，我都好肯定禮拜一嘅八強佢冇正選踢，我覺得蘇斯克查可能會賣走佢。」
其實史高斯自從退咗休之後，一直對曼聯班兵唔太滿意，基本上冇邊位魔兵冇鬧過。不過身為紅魔嘅名宿，史高斯早前居然無視限聚令搞生日P賀囝囝生日，仲搞到要俾當地警方警告。事關上禮拜五係史高斯囝囝阿倫嘅21歲生日，所以史高斯就喺自己價值350萬鎊嘅豪宅幫囝囝搞生日P。當地喺上禮拜四實施咗新一輪限聚令，但史高斯無視禁令，仲請咗唔少人嚟參加，片段可以見到佢哋完全無視社交距離，有機會隨時又再爆發群組感染，史高斯今次真係「有口話人冇口話自己」喇。
另外，意甲國際米蘭喺周四宣佈，今季借將山神正式加盟，簽訂三年合約。呢次轉會，31歲嘅山神係以自由身加盟國際，佢喺18年加盟紅魔，基本人工加上獎金等周薪可達50萬鎊，不過來季就大減到得番13萬鎊；山神喺18年加盟同曼聯簽約四年半，紅魔可以提早甩走包袱，唔排除好似早前傳聞咁，要向山神支付一筆「分手費」先傾得掂數。
