滙控（005）今個星期公佈業績，成績表一如預期唔多好睇，不過近年這種「遜預期」的業績對滙控來說已經屢見不鮮，早已對這間公司沒有期望。反而本人最關心的是那些靠滙控收息的投資者現在過得如何，只能希望他們早已與滙控斬纜。不過並不是每個人都可以如此理智狠心，我就有個朋友情繫滙控，工作多年儲下不少滙豐股票，從來不賣。
我的朋友再次提醒我投資止蝕的重要性，雖說長線投資總好過買買賣賣，但卻不等於要與股票天荒地老。須知道股神畢菲特都會犯錯，以長線投資見稱的他亦會賣掉股票，那更河況我們一介普通投資者？須知道我哋普通人買股票，如果股票錄得一定跌幅，自己睇錯的機會是遠高於市場睇錯，所以長揸只會輸多贏少。
滙豐近年負面新聞不斷，裁員、罰錢、出售業務、被制裁等一單接一單，為甚麼還有人長揸唔放？其中一個可能是都市人比較忙碌，買完股票後都無乜時間再理會。如果真的如此，那就更要止蝕機制保住後路，至少你唔留意新聞都會留意股價。不過如果真的喜歡長揸唔理，我還是建議不如買指數基金，起碼去除了非系統性風險，早已有研究指，死揸指數基金的回報並不低於自己買股票，那何樂而不為？
神仙丁
《審計搵丁》負責人