疫情第三波爆發唔少人不幸染疫同病逝，戴口罩除咗保護自己，亦係保護其他人。不過熱血公民仍然好堅持唔戴，甚至鬧戴口罩既香港人，成員鄭松泰前排立法會報名期間，甚至戴咗個「透明口罩」，畀網民笑係快餐店口罩，對防疫完全無用。
解釋為防疫
不過泰博之前出席一個教育界記招時，一反「教條」戴咗個外科口罩，成為記者會另類「焦點」。
now政情網上行話泰博戴嘅係韓仔KF94口罩，不過佢其後喺facebook澄清係本地牌子，仲話某啲職業、緊急溝通嘅場合都有需要戴返口罩，仲話要「理智防疫」、「合理地戴口罩」咁話。查實香港人都理性抗疫咗好多個月，例如八方見到唔少街市檔主每日唔止準備一個口罩，預備整濕咗可以更換，好多黃的士司見到客人唔戴口罩都唔畀上車，講到底，都係做多一步令香港快啲康復，正所謂「人冇事先做到世界冠軍」。「國師」陳雲曾經笑過香港人「強者不戴罩」，睇嚟呢句說話，又少咗個人相信喇。