對於港台製作的《警訊》將於下周三播出最後一集， 梁皓妤（Ruby）和馬溱禧（Heily）兩位「警訊之花」，前者2017年開始當主持，至今年4月疑因社交網言論被篤灰而遭撤離；後者於《警訊》案件重演環節演足11年騙徒，節目突然停播，連她自己亦感愕然。
歸根究柢，《警訊》何解被停播，Ruby和Heily心裏有數，只是當下有口難言，Heily說：「大家唔會講太多說話，但唔代表冇表達。」Ruby則表示：「我係一個小職員，唔能夠對老闆（上司）發表任何言論。」
可以隨心隨意發表言論的日子總會再來，當下一切就在心中吧！
香港電台（港台）近年被指「唔聽話」，《頭條新聞》冇得留低、「七一典禮」改由TVB承辦，就連啟播47年的《警訊》亦被撤換製作單位，將在另一個電視台「翻生」播出。
但真相，似乎只有「行內人」最清楚，前女警員兼《警訊》主持梁皓妤（Ruby）和做了11年《警訊》演員的馬溱禧（Heily）日前接受訪問，Heily坦言近年的港台氣氛確實起了變化，她感慨謂：「差都唔係最近嘅事，好明顯睇得出辦公室內大家都唔敢出聲、好安靜，大家唔會講太多說話，但唔代表冇表達（不滿），整個辦公室都貼滿工會嘅紙，氣氛好奇怪，但大家都有同一個理念。」
Heily在《警訊》中經常扮演靚女騙徒，被譽為「警訊之花」，曾以此為榮，如今卻因為警民關係變差，現在社交網自我簡介一欄，這個美譽已靜悄悄地消失。她解釋：「之前覺得係好事（封號），但𠵱家有啲保留，因為外面有啲公司或客戶，都會問我可唔可以刪走，雖然冇講明原因，但佢哋都唔想人諗太多。」
Ruby就爆料，港台與警察公共關係科（PPRB）早在3年前已埋下伏線，抗爭運動與警民關係變差只是一個契機，令雙方終斷近半世紀的合作關係。Ruby說：「3年前我剛入《警訊》已經有聽過，而佢哋（PPRB）所講嘅原因，係話港台嘅導演同監製對我哋警務人員嘅態度唔好，但對我嚟講，反而合作得好開心，即使家我冇做，但係同台前幕後都係咁close。只係可惜我係一個小職員，唔能夠對老闆（上司）發表任何言論。」
誰是「金手指」Ruby沒有明言，但她可算是警界中的異數，在香港樹仁大學新聞與傳播學系畢業，曾短暫在亞洲電視任記者，2014年滿腔熱誠加入警隊，但入職兩年多已經想劈炮唔撈，談到原因，她欲言又止：「最大分歧係文化上嘅落差，同我預想嘅警察唔同。而且我未能融入警隊文化，一直覺得警察係應該好正義……呢方面可能唔好講喇，因為我老公係警察，佢都被人『搞』，但其實還好，佢唔係黑警，我知道就得。」
Ruby任《警訊》主持期間，人氣明顯沒有另一位拍檔羅啟宏督察般高，她卻有點憤憤不平說：「前期資料搜集全都係我做，其他人有冇做過呢？港台導演監製當然有，但PPRB呢？唔係得我一個主持人，我都要為自己平反！如果我唔講，一啲冒警罪、唔畀錢走咗都有罪，以及點解要出示委任證，呢啲主題都係我諗出嚟，唔講大家又點會知道呢。」
Ruby不介意講出「事實」，但早前疑被「藍絲」篤灰，指她曾於fb讚好「香港黑警 Hong Kong PoPo」專頁、曾上載支持平反六四的相片，稱她是「警訊曱甴女警」，最終被調離《警訊》，而她亦在今年4月辭職。「其實我冇講過啲乜嘢，有啲人會覺得你抵死啦，冇咗份工……由佢哋啦，其實我真係一早就已經想辭職。」
沒有了《警訊》的幕前工作，Ruby和Heily亦不太擔心自己的前路，Ruby現正做freelance PR及海洋保育工作，並應徵做港台另一個節目主持；而向來知道娛樂圈「搵唔到食」的Heily，則更早未雨綢繆，開食品工廠和蛋糕店，做小生意謀生。
撰文：嵐山