噚日有Telegram頻道公開表示，有多個消息來源確認警隊一哥鄧炳強確診武肺，有網民唔知係咪太擔心要壓驚，話如果係真嘅要即刻開酒飲。其實網民有咁嘅「憂慮」都唔奇，畢竟PK鄧近來為咗國家安全重任頻頻同大陸國安人員會面，佢哋豁免檢疫之餘仲同一哥除罩合照，都咪話唔驚！
全城咁多網民擔心一哥安危，警方傍晚公告澄清處長確診係「毫無事實根據」，仲話「警方嚴厲譴責別有用心之徒唯恐天下不亂，必定嚴肅跟進。」的確國家安全同全港治安都寄託喺處長身上，處長可謂天下嘅定海神針呀。不過市民關心還關心，但警方嘅澄清公告，就引起好多疑問，藝人杜汶澤就喺facebook發文問，公告入面提及嚴厲譴責嘅「唯恐天下不亂」，究竟係咪新罪？警方點嚴肅跟進「唯恐天下不亂」？八方只可以答：你又冇做過警察，唔好質疑呀吓。